Razılaşdırılmışdır:
Azərbaycan Respublikası
Milli Bankı İdarə Heyətinin
sədri E.S.Rüstəmov

Azərbaycan Respublikası Mərkəzi Seçki
Komissiyasının 8 iyul 2005-ci il tarixli
15/51 saylı Qərarı ilə təsdiq edilmişdir.
Mərkəzi Seçki Komissiyasının sədri
M.M.Pənahov _________________

Azərbaycan Respublikası Milli Məclisinə seçkilərdə xüsusi seçki hesablarının açılmasının və aparılmasının uçotu, hesabatı qaydası, habelə namizədlərin, qeydə alınmış namizədlərin, siyasi partiyaların, siyasi partiyalar bloklarının seçki fondlarına vəsaitin daxil olması və xərclənməsi qaydaları haqqında

T Ə L İ M A T

Bu Təlimat Azərbaycan Respublikası Seçki Məcəlləsinin (bundan sonra – Seçki Məcəlləsi) 94.1-ci maddəsinə əsasən hazırlanıb və “Banklar haqqında” Azərbaycan Respublikası Qanununa uyğun olaraq Milli Məclisə seçkilərdə xüsusi seçki hesablarının açılmasının və aparılmasının uçotu, hesabatı qaydası, habelə namizədlərin, qeydə alınmış namizədlərin (bundan sonra – namizədin), siyasi partiyaların, siyasi partiyalar bloklarının seçki fonduna vəsaitin daxil olması və xərclənməsi qaydalarını müəyyən edir.
1. Qeydə alınmış namizəd siyasi partiyalar və siyasi partiyaların blokları Seçki Məcəlləsinin 91-ci və 156-cı maddələrinə müvafiq qaydada və müddətdə seçki fondunu formalaşdırmaq üçün xüsusi seçki hesabı açmalıdır. Deputatlığa namizədin seçki fondu Seçki Məcəlləsinin 156-cı maddəsi ilə müəyyənləşdirilmiş həcmdə və həmin maddədə nəzərdə tutulmuş mənbələr hesabına yaradılmaqla, “Kapital Bank” Açıq Səhmdar Cəmiyyətində, o cümlədən onun filiallarında xüsusi hesabda saxlanılır.
Həmin hesab birmandatlı seçki dairəsi üzrə namizədliyin irəli sürülməsi barədə dairə seçki komissiyasına bildiriş təqdim etdikdən sonra 5 gün müddətində namizədin qeydiyyatı üçün zəruri olan seçici imzalarının yığılmasına azı 24 saat qalmış açılmalıdır. Namizəd, siyasi partiya, siyasi partiyaların bloku yalnız 1 xüsusi hesab aça bilər.
Azərbaycan Respublikası Seçki Məcəlləsi ilə müəyyənləşdirilmiş qaydada rəsmiləşdirilmiş sənədlər təqdim edildikdə müvafiq bank namizədə, siyasi partiyaya, siyasi partiyaların blokuna 3 gün müddətində xüsusi seçki hesabı açmalıdır. Bütün pul vəsaiti xüsusi seçki hesabına manatla köçürülür.
2. Namizədlər üçün vahid seçki fondu yaratmaq niyyətində olan siyasi partiyalar, siyasi partiyaların blokları birmandatlı seçki dairələrinin 60-dan çoxunda irəli sürülən namizədlərin siyahısını Mərkəzi Seçki Komissiyasına təqdim etdikdən sonra 5 gün müddətində vahid seçki fondunu formalaşdırmaq üçün xüsusi seçki hesabı açırlar.
3. Bu Təlimatın birinci bəndində nəzərdə tutulmuş “Kapital Bank” Açıq Səhmdar Cəmiyyəti və onun filiallarından başqa, digər bank və kredit təşkilatlarında xüsusi seçki hüsablarının açılması qadağandır.
4. Namizəd, siyasi partiyalar, siyasi partiyaların bloku xüsusi seçki hesabı açmaq üçün namizəd və ya onun səlahiyyətli nümayəndəsi, siyasi partiya və ya siyasi partiyalar blokunun maliyyə məsələləri üzrə səlahiyyətli nümayəndəsi aşağıdakı sənədləri müvafiq banka təqdim etməlidir:
a) namizəd ( və ya onun səlahiyyətli nümayəndəsi):
- xüsusi seçki hesabının açılması üçün ərizə;
- namizədliyin irəli sürülməsi barədə bildirişin dairə seçki komissiyası tərəfindən təsdiq edilmiş surəti;
- Azərbaycan Respublikası Seçki Məcəlləsinin 53-cü maddəsinin tələbinə uyğun tərtib edilmiş deputatlığa namizədliyi irəli sürülmüş şəxsin onun məhkumluğuna, vətəndaşlığına və başqa dövlətlər qarşısında öhdəliyinə dair məlumatlar, habelə deputat seçiləcəyi halda həmin vəzifə ilə uzlaşmayan fəaliyyətinə xitam verəcəyi barədə öhdəliyi göstərilmiş ərizə;
- namizədin səlahiyyətli nümayəndəsinin (əgər səlahiyyətli nümayəndə təyin edibsə) notarial qaydada rəsmiləşdirilmiş vəkalətnaməsi.
b) siyasi partiyalar:
- xüsusi seçki hesabının açılması üçün ərizə;
- dövlət qeydiyyatına alınması haqqında sənədin (şəhadətnamənin) notariat qaydasında təsdiq edilmiş surəti;
- siyasi partiyanın qüvvədə olan nizamnaməsinin notariat qaydasında təsdiq edilmiş surəti;
- namizədin irəli sürülməsi barədə siyasi partiyanın qurultayının (konfransının, rəhbər orqanının iclasının) qərarı və müvafiq iclasın protokolu;
- statistika orqanlarında uçot vahidlərinin dövlət reyestrinə daxil edilməsi haqqında şəhadətnamənin notariat qaydasında təsdiq edilmiş surəti;
- dövlət sosial sığorta orqanında uçota alınması barədə bildirişin əsli;
- müvafiq vergi orqanı tərəfindən verilmiş şəhadətnamə - dublikatın əsli;
- namizədliyin irəli sürülməsi barədə bildirişin dairə seçki komissiyası tərəfindən təsdiq edilmiş surəti*;
- Azərbaycan Respublikası Seçki Məcəlləsinin 54-cü maddəsinin tələbinə uyğun tərtib edilmiş deputatlığa namizədliyi irəli sürülmüş şəxsin onun məhkumluğuna, vətəndaşlığına və başqa dövlətlər qarşısında öhdəliyinə dair məlumatlar, habelə deputat seçiləcəyi halda həmin vəzifə ilə uzlaşmayan fəaliyyətinə xitam verəcəyi barədə öhdəliyi göstərilmiş razılıq ərizəsi;
- maliyyə məsələləri üzrə səlahiyyətli nümayəndənin notarial qaydada təsdiq edilmiş vəkalətnaməsi;
- notariat qaydasında təsdiq edilmiş imza və möhür nümunələri vərəqəsi.
c) siyasi partiyalar bloku:
- xüsusi seçki hesabının açılması üçün ərizə;
- namizədliyin irəli sürülməsi barədə bildirişin dairə seçki komissiyası tərəfindən təsdiq edilmiş surəti**;
- siyasi partiyaların blokuna daxil olan siyasi partiyaların qurultaylarının (konfranslarının, rəhbər orqanının iclasının) namizəd irəli sürmək barədə qərarları ilə birlikdə müvafiq iclasların protokolları;
- siyasi partiyaların blokuna daxil olan siyasi partiyaların nümayəndələrinin iclasının (qurultayının, konfransının) siyasi partiyaların bloku adından namizəd irəli sürülməsi haqqında qərarı və müvafiq iclasın protokolu;
- maliyyə məsələləri üzrə səlahiyyətli nümayəndənin notarial qaydada təsdiq edilmiş vəkalətnaməsi;
- notariat qaydasında təsdiq edilmiş imza və möhür nümunələri vərəqəsi.
5. Yuxarıda göstərilən sənədlər təqdim edildikdən sonra müvafiq bank həmin subyektlər üçün dərhal xüsusi seçki hesabı açmalıdır.
6. Xüsusi seçki hesabı və vahid seçki fondu üzrə bütün əməliyyatlar manatla həyata keçirilir.
7. Müvəkkil bank həftədə bir dəfədən az olmamaq şərtilə, səsvermə gününə 10 gündən az müddət qaldıqda isə 3 iş günü ərzində bir dəfədən az olmamaq şərtilə dairə seçki komissiyasına namizədlərin xüsusi seçki hesabına daxil olan (Təlimatın 1 saylı əlavəsinə uyğun formada), eləcə də xərclənən vəsaitlər barədə məlumat verir.
8. Seçki fondunda olan vəsaitə dair sərəncam vermək hüququ həmin fondu yaradan namizədə, qeydə alınmış namizədə, siyasi partiyaya, siyasi partiyaların blokuna, referendum üzrə təşviqat qrupuna məxsusdur. Seçki fondlarında olan vəsaitlər təyinatlı məqsəd daşıyır. Bu vəsaitdən yalnız aşağıdakı məqsədlər üçün istifadə edilə bilər:
a) imza toplanmasına yönəldilmiş təşkilati-texniki tədbirlərin maliyyə təminatı, habelə seçici imzalarının toplanması üçün müvafiq şəxslərə haqq ödənilməsi üçün;
b) seçkiqabağı təşviqatla bağlı tədbirlərin, habelə informasiya və məşvərət xidmətləri dəyərinin ödənilməsi üçün;
c) seçki kampaniyasının keçirilməsi ilə əlaqədar hüquqi şəxslərin və vətəndaşların bilavasitə yerinə yetirdikləri digər işlərin dəyərinin ödənilməsi ilə bağlı xərclər.
9. Namizədlərə təşviqat aparmaq və namizədlərin irəli sürülməsinin müdafiəsi məqsədilə imzaların toplanmasına yönəlmiş təşkilati-texniki tədbirlərin və seçici imzalarının toplanması üçün müvafiq şəxslərin haqqının ödənilməsindən ötrü seçki fonduna daxil olan vəsaitdən başqa, digər pul vəsaitindən istifadə etmək qadağandır.
10. Xüsusi seçki hesabına vəsaitlər yalnız Seçki Məcəlləsinin 156-cı maddəsində göstərilən məbləğdə və göstərilən şəxslər tərəfindən köçürülə bilər.
11. Yalnız Azərbaycan Respublikasının vətəndaşı olan şəxslər tərəfindən könüllü ianələr Seçki Məcəlləsinin 93.1-ci maddəsində göstərilən qaydada köçürülə bilər.
Hüquqi şəxslərin ianələri xüsusi seçki hesabına yalnız nağdsız qaydada, Seçki Məcəlləsinin 93.2-ci maddəsində göstərilən şərtlər nəzərə alınmaqla qəbul edilir.
12. Vətəndaşların və hüquqi şəxslərin könüllü ianələri xüsusi seçki hesabına poçt və ya bank-kredit təşkilatları vasitəsilə müvafiq ödəniş sənədi alındıqdan sonra ən geci iki gün ərzində köçürülməlidir.
13. Namizədlərin, qeydə alınmış namizdələrin, siyasi partiyaların, siyasi partiyalar bloklarının, referendum üzrə təşviqat qruplarının seçki fondlarına könüllü ianə ayırmaq, yaxud natura şəklində və ya xidmət göstərilməsi yolu ilə yardım etmək aşağıdakılara qadağan edilir:
- xarici dövlətlərə və xarici hüquqi şəxslərə;
- xarici vətəndaşlara;
- vətəndaşlığı olmayan şəxslərə;
- 18 yaşına çatmamış vətəndaşlara;
- seçkilərin təyin edilməsi haqqında qərarın rəsmi dərc edildiyi günə olan vəziyyətə görə Azərbaycan Respublikasının hüquqi şəxsinin nizamnamə kapitalında yuxarıda göstərilən şəxslərin iştirak (mülkiyyət) payı 30 faizdən çox olarsa, Azərbaycan Respublikasının hüquqi şəxslərinə;
- beynəlxalq təşkilatlara və beynəlxalq ictimai hərəkatlara;
- dövlət hakimiyyəti orqanlarına və bələdiyyə qurumlarına;
- dövlət, bələdiyyə təşkilatlarına və idarələrinə;
- seçkilərin təyin edilməsi haqqında qərarın rəsmi dərc edildiyi günə olan vəziyyətə görə nizamnamə kapitalında dövlətin və ya bələdiyyənin iştirak payı 30 faizdən artıq olan hüquqi şəxslərə;
- hərbi hissələrə;
- xeyriyyə təşkilatlarına, dini birliklərə, idarələrə və təşkilatlara;
- aşağıdakı məlumatlardan hər hansı birini göstərməyən anonim ianə köçürənlərə ( vətəndaş üçün – soyadını, adını, atasının adını, şəxsiyyət vəsiqəsinin və ya onu əvəz edən sənədinin seriyasını, nömrəsini, verilmə tarixini, yaşayış yerinin ünvanını, doğum tarixini; hüquqi şəxs üçün – vergi ödəyicisinin eyniləşdirmə nömrəsini, adını, qeydiyyat tarixini, bank rekvizitlərini, nizamnamə kapitalında dövlət və ya bələdiyyə payının olmasını, olduğu halda miqdarını, nizamnamə kapitalında xarici kapitalın pay miqdarını göstərməyənlərə və ya qeyri-düzgün göstərənlərə).
14. Namizədlərin, siyasi partiyaların və siyasi partiyalar bloklarının seçki fonduna ianələr Seçki Məcəlləsinin 90.2-ci maddəsində göstərilən və buna hüququ olmayan subyektlərdən daxil olubsa, yaxud Seçki Məcəlləsində nəzərdə tutulan məbləğdən artıq köçürülübsə, müvəkkil bank bu Təlimatın 1 saylı əlavəsinə uyğun olaraq müvafiq seçki komissiyasına məlumat verir.
15. Namizədlərin, qeydə alınmış namizədlərin, siyasi partiyaların, siyasi partiya bloklarının seçki fondlarına ianələr buna hüququ olmayan fiziki və hüquqi şəxslərdən daxil olubsa, ianənin xüsusi seçki hesabına daxil olduğu gündən sonrakı 10 gün müddətində namizəd, qeydə alınmış namizəd, siyasi partiya, siyasi partiyalar bloku ianənin bütünlüklə geri qaytarılmasının səbəbini göstərməklə və göndərmə xərclərini çıxmaqla ianəçiyə qaytarmalıdır.
Anonim ianələr xüsusi seçki hesabına daxil olduqda Seçki Məcəlləsinin 93.7-ci maddəsinə uyğun olaraq dövlət büdcəsinə köçürülür.
16. Müvəkkil bank Seçki Məcəlləsində və bu Təlimatın 9, 10, 11, 12, 13, 14-cü bəndlərində nəzərdə tutulan hallar barədə Mərkəzi Seçki Komissiyasına və dairə seçki komissiyasına hesabat verməlidir.
17. Qeydə alınmış namizədlərin xüsusi seçki hesabları üzrə bütün əməliyyatlar səsvermə günündən sonra 3 iş günü müddətində dayandırılır.
18. Seçki Məcəlləsinin 91.4-cü maddəsində nəzərdə tutulmuş digər hallarda dairə seçki komissiyasının göstərişi ilə müvafiq bank namizədlərin, qeydə alınmış namizədlərin xüsusi seçki hesablarından xərclərin ödənilməsi ilə bağlı maliyyə əməliyyatlarını dayandırır.
19. Maliyyə əməliyyatlarının aparılması müddəti yalnız Seçki Məcəlləsinin 92.1-ci maddəsində müəyyən edilmiş hallarda və əsaslarla Mərkəzi Seçki Komissiyası tərəfindən uzadıla bilər.
20. Milli Məclisə seçkilər zamanı deputatlığa namizədlərin aldıqları pul vəsaitlərinin geri qaytarılması qaydaları Seçki Məcəlləsinin 90.5 – 90.7-ci, 157.4-cü maddələri ilə müəyyən edilir.

21. Namizədlər, qeydə alınmış namizədlər, siyasi partiyalar, siyasi partiyaların blokları müvafiq seçki komissiyasına öz maliyyə hesabatlarını aşağıdakı növbəlikdə (bu Təlimata 2 saylı əlavəyə uyğun) təqdim edirlər:
- birinci ilkin maliyyə hesabatı Seçki Məcəlləsi ilə müəyyənləşdirilmiş qaydada müvafiq seçki komissiyasına qeydiyyat üçün zəruri sənədlərlə eyni zamanda təqdim edilir; bu hesabata hesabatda göstərilmiş tarixə 2 gün qalmışdan əvvəlki dövr üçün məlumatlar daxil edilir;
- ikinci ilkin maliyyə hesabatı səsvermə gününə ən tezi 20 gün qalmış və səsvermə gününə ən geci 10 gün qalmış təqdim edilir; bu hesabata orada göstərilmiş tarixə 7 gün qalmışdan əvvəlki dövr üçün məlumatlar daxil edilir;
- yekun maliyyə hesabatı seçkilərin nəticələrinin rəsmi dərc edildiyi gündən ən geci 10 gün sonra təqdim edilir; yekun maliyyə hesabatına seçki fonduna vəsaitlərin daxil olmasını və xərclənməsini təsdiq edən ilkin maliyyə sənədləri qoşulur.
22. Namizəd, qeydə alınmış namizəd öz statusunu itirdikdə, maliyyə hesabatının verilməsi vəzifəsi namizəd, qeydə alınmış namizəd olmuş vətəndaşaların üzərinə qoyulur. Siyasi partiya, siyasi partiyaların bloku tərəfindən maliyyə hesabatının verilməsi vəzifəsi onların maliyyə məsələləri üzrə səlahiyyətli nümayəndəsinin üzərinə qoyulur, belə səlahiyyətli nümayəndə olmadıqda, siyasi partiyanın və yaxud siyasi partiyalar blokunun tərkibində seçki kampaniyasında iştirak etmiş siyasi partiyanı təmsil etmək səlahiyyəti olan digər şəxs hesabat verə bilər.
23. Namizədlərin, qeydə alınmış namizədlərin seçki fondlarının xüsusi hesabında qalmış pul vəsaitini dairə seçki komissiyasının yazılı göstərişinə uyğun olaraq müvafiq bank səsvermə günündən 60 gün keçdikdən sonra dairə seçki komissiyasının hesabına köçürməlidir.

Azərbaycan Respublikası Seçki Məcəlləsinin 90.2-ci maddəsində nəzərdə tutulan fiziki və hüquqi şəxslərdən daxil olan ianələr barədə məlumat (1 saylı əlavə)

Azərbaycan Respublikasının Milli Məclisinə seçkilərdə deputatlığa namizədin, qeydə alınmış deputatlığa namizədin, siyasi partiyaların və siyasi partiyalar blokunun seçki fondunun gəlir və xərclərinin maliyyə hesabati (2 saylı əlavə)