2009-cu il dekabrın 23-nə təyin edilmiş bələdiyyə seçkilərində bələdiyyə
üzvlüyünə namizədliyi özü tərəfindən irəli sürülmüş Ağayev Əlövsət
Balamirzə oğlunun 24 noyabr 2009-cu il tarixli 48 saylı müraciətinə baxılması barədə
AZƏRBAYCAN RESPUBLİKASI
MƏRKƏZİ SEÇKİ KOMİSSİYASININ
Q Ə R A R I
2009-cu il dekabrın 23-nə təyin edilmiş bələdiyyə seçkilərində 28 saylı Sabunçu III seçki dairəsi üzrə Bilgah bələdiyyəsinin üzvlüyünə namizədliyi özü tərəfindən irəli sürülmüş Yeni Azərbaycan Partiyasının üzvü Ağayev Əlövsət Balamirzə oğlu 2009-cu il noyabrın 24-də Azərbaycan Respublikasının Mərkəzi Seçki Komissiyasına yazılı müraciət edərək, namizədliyinin qeydiyyatından adı çəkilən dairə seçki komissiyası tərəfindən qanunsuz imtina edilməsini bildirmiş və bununla əlaqədar qanunla müəyyən edilmiş qaydada tədbirlər görülməsini xahiş etmişdir.
Müraciət Azərbaycan Respublikası Seçki Məcəlləsinin 112 və 112-1-ci maddələrinə və “Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”a uyğun olaraq Azərbaycan Respublikası Mərkəzi Seçki Komissiyasının nəzdində ekspert qrupunun üzvü tərəfindən araşdırılaraq bu barədə müvafiq rəy verilmiş və Mərkəzi Seçki Komissiyasının iclasında baxılmışdır.
Mərkəzi Seçki Komissiyası vətəndaşların seçki hüquqlarının daha səmərəli təmini prinsipini əsas götürərək, bələdiyyə üzvlüyünə namizədin müraciətinin qanunla müəyyən olunmuş müddətdə, tam, hərtərəfli, obyektiv və qərəzsiz araşdırmışdır.
Araşdırma prosesində bələdiyyə üzvlüyünə namizədlə əlaqə yaradılaraq, ona əlavə sübutlar təqdim etmək və araşdırmada iştirak etmək hüquqları barədə məlumat verilmişdir.
Araşdırma nəticəsində müəyyən edilmişdir ki, Ə.B.Ağayev mülkiyyət hüququ əsasında ona məxsus əmlak barədə məlumatı bəyan edərkən, onun mülkiyyətində olan VAZ-21063 markalı, 10 TR 591 nömrə nişanlı minik avtomobilini qəsdən gizlətmişdir.
Azərbaycan Respublikası Seçki Məcəlləsinin 60.2.2-ci maddəsinə əsasən mülkiyyət hüququ əsasında namizədə məxsus əmlak barədə məlumatın düzgün rəsmiləşdirilməməsi və ya olmaması qeydiyyatdan imtina üçün əsasdır.
Həmçinin bələdiyyə üzvlüyünə namizədin müdafiəsi üçün seçici imzası olan imza vərəqələri nə namizəd, nə də imza toplayan şəxs tərəfindən təsdiq edilməmişdir.
Azərbaycan Respublikası Seçki Məcəlləsinin 58.2-ci maddəsinin tələbinə uyğun olaraq buraxılan səhvlərin düzəldilməsi üçün Ə.B.Ağayev dairə seçki komissiyasına dəvət olunsa da, o, heç bir üzrlü səbəb göstərmədən verilən imkandan istifadə etməmiş və bununla da Məcəllənin 59.9-cu maddəsində nəzərdə tutulmuş hüquqi nəticələr yaranmışdır.
Belə ki, Seçki Məcəlləsinin 59.9-cu maddəsinə əsasən imza vərəqələri imza toplayan şəxsin, habelə namizədin, siyasi partiyanın, siyasi partiyalar blokunun səalhiyyətli nümayəndəsinin əl yazısı qaydasında imzası ilə təsdiq edilməyibsə və ya səlahiyyətli nümayəndənin imzası qeyri-düzgündürsə, imza vərəqələrində olan bütün imzalar etibarsız sayılır.
Yuxarıda göstərilənləri əsas götürərək, Azərbaycan Respublikasının Mərkəzi Seçki Komissiyası Azərbaycan Respublikası Seçki Məcəlləsinin 19.4-cü, 28.2-ci, 112-ci, 112-1-ci maddələrinə və “Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın 1, 2, 4, 6 və 7-ci bəndlərinə əsasən q ə r a r a a l ı r :
1. 28 saylı Sabunçu III seçki dairəsi üzrə Bilgah bələdiyyəsinin üzvlüyünə namizədliyi özü tərəfindən irəli sürülmüş Ağayev Əlövsət Balamirzə oğlunun 24 noyabr 2009-cu il tarixli 48 saylı müraciəti əsassız olduğundan, təmin edilməsin.
2. Qərar dərc edildiyi gündən qüvvəyə minir.
Sədr: Məzahir Pənahov
Müavin: Svetlana Qasımova
Katib: Natiq Məmmədov
Üzvlər:
Fuad Cavadov
Ramiz İbrahimov
Validə Kazımova
Qabil Orucov
Tofiq Həsənov
İlham Məmmədov
Nizami Nadirov
Azər Tağıyev
Tamam Cəfərova
Rövşən İsmayılov
Almas Qəhramanlı
Oktay Hümbətli
|
