Q Ə R A R I

            2009-cu il martın 18-nə təyin edilmiş referendumla əlaqədar “Respublikaçılar” referendum üzrə təşəbbüs qrupunun səlahiyyətli nümayəndəsi Gülağa Aslanlı 21 yanvar 2009-cu ildə Azərbaycan Respublikası Mərkəzi Seçki (Referendum) Komissiyasına müraciət edərək Cəlilabad rayonu Təzəkənd kəndi ərazisində imza toplama prosesi zamanı imza atmış şəxslərə qarşı təzyiqlər edilməsini bildirib, bununla  əlaqədar tədbirlər görülməsini xahiş etmişdir.
Müraciət Azərbaycan Respublikası Seçki Məcəlləsinin 112.1-ci maddəsinin tələbinə uyğun olduğundan, Seçki Məcəlləsinin 112-1.1-ci maddəsinə əsasən Mərkəzi Seçki (Referendum) Komissiyası nəzdində yaradılmış vətəndaşların şikayətlərinin araşdırılması üzrə ekspert qrupunun üzvü tərəfindən araşdırılaraq, bu barədə müvafiq rəy verilmiş və Mərkəzi Seçki (Referendum) Komissiyasının iclasında baxılmışdır.
Araşdırma nəticəsində müəyyən edilmişdir ki, “Respublikaçılar” referendum üzrə təşəbbüs qrupunun maraqlarını təmsil edən şəxslər imza toplanılmasının məqsədləri ilə əlaqədar vətəndaşlara yanlış məlumat verərək, Seçki Məcəlləsinin tələblərini pozmaqla  bir qrup Cəlilabad rayon Təzəkənd kənd sakinlərindən imza toplamışlar. Bununla əlaqədar həmin sakinlər öz hüquqlarının pozulmasını iddia edərək kənd icra nümayəndəsi, kənd bələdiyyəsinin sədri və sahə inspektoruna bu barədə məlumat vermişlər. Eyni zamanda həmin səlahiyyətli şəxslər tərəfindən imza vermiş vətəndaşlara və müvafiq təşəbbüs qrupunun maraqlarını təmsil edən imza toplayan şəxslərə qarşı hər hansı bir təzyiqlər edilməmişdir.
Göstərilənlərə əsasən “Respublikaçılar” referendum üzrə təşəbbüs qrupunun səlahiyyətli nümayəndəsi Gülağa Aslanlının müraciəti əsassız olduğundan təmin edilməməlidir.
Yuxarıda qeyd edilənlərə əsasən Azərbaycan Respublikası Mərkəzi Seçki (Referendum) Komissiyası Azərbaycan Respublikası Seçki Məcəlləsinin 112, 112-1-ci maddələrinə və “Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın 1, 2, 4, 6 və 7-ci bəndlərinə əsasən qərara alır:
           
1.“Respublikaçılar” referendum üzrə təşəbbüs qrupunun səlahiyyətli nümayəndəsi Gülağa Aslanlının müraciəti əsassız olduğundan təmin edilməsin.

2.Qərar dərc edildiyi andan qüvvəyə minir.

Sədr                                                                                                 Məzahir Pənahov

Müavin                                                                                             Svetlana Qasımova

Katib                                                                                                Natiq Məmmədov

Üzvlər:                                                                                              

Fuad Cavadov

Ramiz İbrahimov

Validə Kazımova

Qabil Orucov

Tofiq Həsənov

İlham Məmmədov

Nizami Nadirov

Azər Tağıyev

Tamam Cəfərova

Rövşən İsmayılov

Oktay Hümbətli