2008-ci il oktyabrın 15-nə təyin edilmiş Azərbaycan Respublikası Prezidentinin seçkilərində namizədi qeydə alınmış Azərbaycan Ümid Partiyasının səlahiyyətli nümayəndəsi Nəsimi Məmmədli Azərbaycan Respublikasın Mərkəzi Seçki Komissiyasına müraciət edərək namizədliyi Müasir Müsavat Partiyası tərəfindən irəli sürülərək qeydə alınmış prezidentliyə namizəd Hafiz Ələmdar oğlu Hacıyevin 26 sentyabr 2008-ci ildə İctimai radioda keçirilən “Dəyirmi masa”da çıxışı zamanı namizədliyi Azərbaycan Ümid Partiyası tərəfindən irəli sürülərək qeydə alınmış namizəd İqbal Feyruz oğlu Ağazadənin ünvanına böhtanlar söyləməsini, onun şərəf və ləyaqətini alçaldan mülahizələr səsləndirməsini bildirərək, müvafiq tədbirlərin görülməsini xahiş etmişdir.
Müraciət Azərbaycan Respublikası Seçki Məcəlləsinin 112.1-ci maddəsinin tələblərinə uyğun olduğundan həmin Məcəllənin 74.5-ci maddəsinə əsasən Mərkəzi Seçki Komissiyası nəzdində yaradılmış seçkiqabağı təşviqat üçün müəyyən olunmuş qaydalara riayət edilməsinə nəzarəti həyata keçirən mətbuat qrupu tərəfindən araşdırılaraq bu barədə müvafiq rəy verilmiş və Mərkəzi Seçki Komissiyasının iclasında baxılmışdır.
Azərbaycan Respublikası cinayət prosessual qanunvericiliyinin tələblərinə əsasən bu xarakterli əməllər xüsusi ittiham qaydasında təqib edilən işlər kateqoriyasına aid olduğundan zərərçəkən tərəfindən məhkəməyə müraciət etmə yolu ilə həll edilə bilər.
Azərbaycan Ümid Partiyasının səlahiyyətli nümayəndəsi Nəsimi Məmmədlinin müraciəti əsassız olduğundan təmin edilməməlidir.
Göstərilənlərə əsasən Azərbaycan Respublikası Mərkəzi Seçki Komissiyası Azərbaycan Respublikası Seçki Məcəlləsinin 19.4-cü, 19.14-cü, 28.2-ci, 28.4-cü, 88-ci, 112-ci, 112-1-ci maddələrinə əsasən  q ə r a r a   a l ı r :

1.      2008-ci il oktyabrın 15-nə təyin edilmiş Azərbaycan Respublikası Prezidentinin seçkilərində namizədi qeydə alınmış Azərbaycan Ümid Partiyasının səlahiyyətli nümayəndəsi Nəsimi Məmmədlinin müraciəti əsassız olduğundan təmin edilməsin.

2.      Qərar dərc edildiyi gündən qüvvəyə minir.

Sədr                                                                            Məzahir Pənahov

Müavin                                                                         Svetlana Qasımova

Katib                                                                            Natiq Məmmədov

Üzvlər:                                                                       

 Ramiz İbrahimov

Validə Kazımova

Tofiq Həsənov

İlham Məmmədov

Nizami Nadirov

Azər Tağıyev

Tamam Cəfərova

Rövşən İsmayılov

Oktay Hümbətli