Azərbaycan Respublikası Mərkəzi Seçki Komissiyasının 4 iyul 2005-ci il tarixli 13/39 saylı Qərarı ilə təsdiq edilmişdir.

Könüllü qeydiyyat depozitinin köçürülməsi və qaytarılması qaydaları haqqında
TƏLİMAT

1. Könüllü qeydiyyat depozitinin köçürülməsi və qaytarılıb-qaytarılmaması qaydaları Azərbaycan Respublikası Seçki Məcəlləsinin 58.5-ci, 60.5-ci, 73.2-ci, 156.1-ci maddələri ilə və bu Təlimatla tənzimlənir.
1.1. Azərbaycan Respublikasının Milli Məclisi deputatlığına namizədin (bundan sonra - deputatlığa namizəd) qeydə alınması üçün imza vərəqələri və digər seçki sənədləri təqdim edilərkən, eyni zamanda,qeydiyyatı həyata keçirən müvafiq dairə seçki komissiyasının hesabına namizədin seçki fondu vəsaitinin Seçki Məcəlləsinin 156.1-ci maddəsinə əsasən seçkilərin təyin edilməsi haqqında qərarın rəsmi dərc edildiyi günə müəyyənləşdirilən yuxarı həddinin, yəni şərti maliyyə vahidinin 75 min mislinin Seçki Məcəlləsinin 58.5-ci maddəsində göstərilən 3 faizi məbləğində, könüllü qeydiyyat depozitinin köçürülməsi barədə bank sənədi təqdim edilə bilər. Həmin sənəddə ödənişin təyinatı, yəni "qeydiyyat depoziti üçün"sözləri yazılmalıdır.
1.2. Könüllü qeydiyyat depoziti qeydiyyatı həyata keçirən seçki komissiyasının bank hesabına köçürülərkən deputatlığa namizədin, siyasi
partiyanın, siyasi partiyalar blokunun seçki fondundan istifadə edilə
bilməz.
2. Deputatlığa namizəd qeydə alınmazsa, qeydiyyatdan imtina
haqqında qərarın surətini aldıqdan sonra 3 gün müddətində namizəd,
namizədi irəli sürmüş siyasi partiyanın rəhbər orqanı, siyasi partiyalar blokunun nümayəndələrinin iclası könüllü qeydiyyat depozitinin geri qaytarılmaması şərtilə deputatlığa namizədin müvafiq dairə seçki komissiyası tərəfindən qeydə alınması barədə müraciət (namizədin soyadı, adı, atasının adı, şəxsiyyət vəsiqəsinin seriya və nömrəsi, deputatlığa namizədin təsdiq edilməməsi barədə qərarın tarixi və nömrəsi göstərilməklə) edə bilər.
2.1. Bu halda, dairə seçki komissiyası deputatlığa namizədi 2 gün
müddətində qeydə alır. Bütün digər hallarda, könüllü qeydiyyat depoziti
dairə seçki komissiyası tərəfindən qeydə alınmaq və qeydiyyatdan imtina
etmək haqqında müvafiq qərarın qəbul edilməsindən 3 gün müddətində
namizədə, namizədi irəli sürmüş siyasi partiyaya, siyasi partiyaların
blokuna qaytarılır.
2.2. Namizəd Milli Məclisin deputatı seçilərsə və seçicilərin etibarlı hesab edilən səslərinin azı 3 faizini toplayarsa, qeydiyyat depoziti seçkilərin ümumi yekunları rəsmi dərc edildikdən sonra 3 gün müddətində müvafiq dairə seçki komissiyası tərəfindən namizəd olmuş şəxsə qaytarılır. Deputatlığa namizəd seçicilərin etibarlı hesab edilən səslərinin azı 3 faizini toplaya bilməzsə, könüllü qeydiyyat depoziti geri qaytarılmır.
2.3. Qeydə alınmış deputatlığa namizədin məhkəmə tərəfindən fəaliyyət qabiliyyəti olmayan hesab edilərək, Azərbaycan Respublikasının Əmək Məcəlləsində nəzərdə tutulan müvafiq tibbi ekspertiza orqanı tərəfindən təsdiqlənmiş ağır xəstəliyi və ya iştirakını mümkünsüz edən səbəblər nəticəsində seçki kampaniyası dövründə sağlamlığının pozulması, habelə siyasi partiyanın, siyasi partiyalar blokunun onu geri çağırmasına məcburedici əsaslar olmadan namizədliyini geri götürdüyü hallarda könüllü qeydiyyat depoziti geri qaytarılmır.

________

Qeyd: Qeydiyyat depoziti yalnız namizədin müdafiəsi üçün toplanmış etibarlı imzaların sayı namizədin qeydə alınması üçün kifayət etmədikdə bu Təlimatın 2.1-ci bəndində göstərilən qeydiyyat üçün əsas ola bilər.