Azərbaycan Respublikası
Mərkəzi Seçki Komissiyasının
4 iyul 2005-ci il tarixli
13/38 saylı Qərarı ilə təsdiq edilmişdir.

Azərbaycan Respublikasının Milli Məclisinə seçkilərdə seçicilərin təşəbbüs qruplarının yaradılması, vətəndaşların öz təşəbbüsü və ya seçicilərin təşəbbüs qrupunun deputatlığa namizədi irəli sürmələri qaydası haqqında

T Ə L İ M A T

1. Azərbaycan Respublikasında Milli Məclisə seçkilər zamanı vətəndaşların öz təşəbbüsü ilə və ya aktiv seçki hüququ olan vətəndaşların yaratdıqları təşəbbüs qrupları tərəfindən deputatlığa namizədin irəli sürülməsi Azərbaycan Respublikası Seçki Məcəlləsinin 53-cü və 146-cı maddələri ilə nizama salınır.

1.1. Seçki dairəsi üzrə seçkilərdə namizədlər bu seçkilərin təyin edilməsi haqqında qərar rəsmi dərc olunduqdan sonra irəli sürülür.

1.2. Təkrar və əlavə seçkilərdə də namizədlər Azərbaycan Respublikası Seçki Məcəlləsinin 145.4-cü maddəsində göstərilən müddətdən, yəni seçkilərin təyin edilməsi barədə qərar onun qəbul edildiyi gündən başlayaraq ən geci 2 gün ərzində kütləvi informasiya vasitələrində rəsmi dərc edildikdən sonra irəli sürülür.

1.3. Namizədi irəli sürən subyektlərdən biri kimi seçicilərin təşəbbüs qrupunun yaradılması və namizədliyin irəli sürülməsi qanunvericilikdə və bu Təlimatda nəzərdə tutulmuş qaydada nizama salınır. Seçicilərin təşəbbüs qrupunu seçki hüququ olan hər bir vətəndaş, yaxud vətəndaşlar 50 nəfərdən ibarət tərkibdə yarada bilərlər. Bunun üçün onlar öz yığıncağını keçirməlidirlər. Təşəbbüs qrupu yaratmaq istəyən seçicilərin müvafiq seçki dairəsinin ərazi vahidlərində yaşaması faktı əsas götürülür. Təşəbbüs qrupu yaratmaq istəyən vətəndaş və ya vətəndaşlar tərəfindən bələdiyyə qurumunun rəhbərliyinə və ya ərazi üzrə icra hakimiyyətinin yerli nümayəndəsinə yığıncaq keçirmək üçün yer ayrılması barədə yazılı müraciət edilə bilər. Həmçinin seçicilərin təşəbbüs qrupunun yığıncağı seçicilərin yaşayış yeri üzrə, icra və bələdiyyə qurumları, o cümlədən digər hüquqi şəxslərin ərazi və binalarında keçirilə bilər. Müvafiq yer müəyyənləşdirildikdən sonra təşəbbüs qrupu yaratmaq istəyən seçicilərə yığıncağın keçirilməsi üçün ayrılmış yer və vaxt barədə məlumat verilir.

2. Yığıncaqda aşağıdakı məsələlər müzakirə olunur:

2.1. Seçicilərin təşəbbüs qrupunun yaradılması və adlandırılması.

2.2. Qrupu təmsil edəcək şəxsin (təşəbbüs qrupunun nümayəndəsi) müəyyən edilməsi (bu şəxs iclasın sədri və ya katibi ola bilər).

2.3. Deputatlığa namizədliyin irəli sürülməsi.

2.4. Namizədliyin irəli sürülməsinin təsdiq edilməsi üçün dairə seçki komissiyasına bildirişlə müraciət edilməsi.

Yığıncağın gündəliyinə çıxarılaraq müzakirə edilmiş hər bir məsələ barədə qərar qəbul olunur və yığıncağın protokolu tərtib edilir. Protokolu iclasın sədri və katibi imzalayır. İclasın protokolunun həmin qurumların, o cümlədən iclasın keçirildiyi yerin məxsus olduğu hüquqi şəxslərin möhürü ilə möhürlənməsi də mümkündür.

3. Seçicilərin təşəbbüs qrupunun irəli sürdüyü deputatlığa namizədin sənədlərini müvafiq dairə seçki komissiyasına seçicilərin təşəbbüs qrupunun nümayəndəsi, habelə namizəd və ya onun səlahiyyətli nümayəndəsi təqdim edə bilər. Deputatlığa namizədin seçicilərin təşəbbüs qrupu tərəfindən irəli sürülməsi üçün müvafiq dairə seçki komissiyasına aşağıdakı sənədlər təqdim olunmalıdır:

3.1. Namizədin irəli sürülməsinə təşəbbüs edilməsi barədə bildiriş (Təlimata 1 saylı əlavə).

3.2. Seçicilərin təşəbbüs qrupunun yaradılması və namizədliyin irəli sürülməsi barədə yığıncağın protokolu (Təlimata 2 saylı əlavə).

3.3. Azərbaycan Respublikasının Seçki Məcəlləsinin 53-cü maddəsinin tələblərinə uyğun tərtib edilmiş deputatlığa namizədliyi irəli sürülmüş şəxsin, onun məhkumluğuna və vətəndaşlığına dair məlumatlar, habelə deputat seçiləcəyi halda həmin vəzifə ilə uzlaşmayan fəaliyyətə xitam verəcəyi barədə öhdəliyi göstərilmiş ərizəsi (Təlimata 3 saylı əlavə).

3.4. Namizəd tərəfindən səlahiyyətli nümayəndə təyin edilibsə,
səlahiyyətli nümayəndənin notariat qaydasında təsdiq edilmiş vəkalətnaməsi (Təlimata 5 saylı əlavə).

3.5. Namizəd öz ərizəsində siyasi mənsubiyyətinə dair məlumat daxil edibsə, bu barədə təsdiqedici sənəd verməlidir.

Belə halda, namizəd mənsub olduğu siyasi partiyanın 5 sözdən çox olmayan adla adlandırılmasını müvafiq seçki komissiyası ilə razılaşdırır. Ərizədə göstərilmiş siyasi partiya namizədi öz sıralarından xaric edibsə və müvafiq seçki komissiyasına bildiriş göndəribsə, bu bildiriş alındıqdan sonra həmin namizədlə əlaqədar siyasi partiyanın adından istifadə edilə bilməz.

Dairə seçki komisiyasına təqdim edilmiş sənədlərin alınması barədə yazılı arayış həmin sənədləri təqdim etmiş şəxsə və ya buna hüququ olan digər şəxsə verilməlidir (Mərkəzi Seçki Komissiyasının 2 iyul 2004-cü il tarixli 07/52 saylı Qərarı ilə təsdiq edilmiş formada, Təlimata 6 saylı əlavə).

Dairə seçki komisiyasına təqdim edilmiş sənədlərə 5 gün müddətində baxılır, namizədin səlahiyyətli nümayəndəsinə və ya seçicilərin təşəbbüs qrupunun nümayəndəsinə namizədin irəli sürülməsinin təsdiq olunub olun-madığı barədə qərar təqdim edilir.

4. Öz təşəbbüsü ilə deputatlığa namizədliyini irəli sürən vətəndaş müvafiq dairə seçki komissiyasına aşağıdakı sənədləri təqdim etməlidir:

4.1. Deputatlığa namizədliyin irəli sürülməsinə dair bildiriş (Təlimata 4 saylı əlavə).

4.2. Azərbaycan Respublikası Seçki Məcəlləsinin 53-cü maddəsinin tələblərinə uyğun tərtib edilmiş deputatlığa namizədliyi irəli sürülmüş şəxsin, onun məhkumluğuna və vətəndaşlığına dair məlumatlar, habelə deputat seçiləcəyi halda həmin vəzifə ilə uzlaşmayan fəaliyyətə xitam verəcəyi barədə öhdəliyi göstərilmiş ərizəsi (Təlimata 3 saylı əlavə).

4.3. Namizəd tərəfindən səlahiyyətli nümayəndə təyin edilibsə, həmin səlahiyyətli nümayəndənin notariat qaydasında təsdiq edilmiş vəkalətnaməsi (Təlimata 5 saylı əlavə).

4.4 Namizəd öz ərizəsində siyasi mənsubiyyətinə dair məlumat daxil edibsə, bu barədə təsdiqedici sənəd.

Belə halda, namizəd mənsub olduğu siyasi partiyanın 5 sözdən çox olmayan adla adlandırılmasını müvafiq seçki komissiyası ilə razılaşdırır. Ərizədə göstərilmiş siyasi partiya namizədi öz sıralarından xaric edibsə və müvafiq seçki komissiyasına bildiriş göndəribsə, həmin bildiriş alındıqdan sonra həmin namizədlə əlaqədar siyasi partiyanın adından istifadə edilə bilməz.
Dairə seçki komissiyasına təqdim edilmiş sənədlərin alınması barədə yazılı arayış səlahiyyətli nümayəndəyə verilir (Mərkəzi Seçki Komissiyasının 2 iyul 2004-cü il tarixli 07/52 saylı Qərarı ilə təsdiq edilmiş formada, Təlimata 6 saylı əlavə).
Dairə seçki komissiyası təqdim edilmiş sənədlərə 5 gün müddətində baxır, namizədə və ya onun səlahiyyətli nümayəndəsinə namizədin irəli sürülməsinin təsdiq olunub-olunmadığı barədə qərar təqdim edir.

Milli Məclisə seçkilərdə deputatlığa namizəd irəli sürülməsinə təşəbbüs edilməsi haqqında bildiriş (1 saylı əlavə)

Azərbaycan Respublikasının Milli Məclisinə seçkilərdə seçicilərin təşəbbüs qrupunun yaradılması və deputatlığa namizədin irəli sürülməsi üzrə yığıncağın protokolu (2 saylı əlavə)

Öhdəlik Ərizəsi (3 saylı əlavə)

Azərbaycan Respublikasının Milli Məclisinə seçkilərdə Milli Məclisin deputatlığına namizəd irəli sürülməsinə təşəbbüs edilməsi haqqında bildiriş (4 saylı əlavə)

Vəkalətnamə (5 saylı əlavə)

Arayış (6 saylı əlavə)