Razılaşdırılmışdır:
Azərbaycan Respublikası
Milli Bankı İdarə Heyətinin
sədri_E.S.Rüstəmov

Azərbaycan Respublikası Mərkəzi Seçki Komissiyasının 28 avqust 2004-cü il tarixli 16/97 saylı Qərarı ilə təsdiq edilmişdir.

Bələdiyyə seçkilərində xüsusi seçki hesablarının açılmasının və aparılmasının uçotu, hesabatı qaydası, habelə namizədlərin, qeydə alınmış namizədlərin, siyasi partiyaların, siyasi partiyalar bloklarının seçki fondlarına vəsaitin daxil olması və xərclənməsi qaydaları haqqında

T ə l i m a t

Bu Təlimat Azərbaycan Respublikası Seçki Məcəlləsinin (bundan sonra – Seçki Məcəlləsi) 94.1-ci maddəsinə əsasən hazırlanıb və Azərbaycan Respublikası “Banklar haqqında” Qanununa uyğun olaraq bələdiyyə seçkilərində xüsusi seçki hesablarının açılmasının və aparılmasının ucotu, hesabatı qaydası, habelə namizədlərin, qeydə alınmış namizədlərin (bundan sonra – namizədin), siyasi partiyaların, siyasi partiyalar bloklarının seçki fonduna vəsaitin daxil olması və xərclənməsi qaydalarını müəyyən edir.
1. Bələdiyyə üzvlüyünə namizəd seçkiqabağı təşviqatı maliyyələşdirmək üçün Seçki Məcəlləsinin 91-ci və 225-ci maddələrinə müvafiq qaydada və müddətdə seçki fondunu formalaşdırmaq üçün xüsusi seçki hesabı açmalıdır. Bələdiyyə üzvlüyünə namizədin seçki fondu Seçki Məcəlləsinin 225-ci maddəsi ilə müəyyənləşdirilmiş həcmdə və həmin maddədə nəzərdə tutulmuş mənbələr hesabına yaradılmaqla, Birləşmiş Universal Səhmdar Bankında, o cümlədən onun filiallarında xüsusi hesabda saxlanılır.
2. Bələdiyyə üzvlüyünə namizədin irəli sürülməsi dairə seçki komissiyasının müvafiq qərarı ilə təsdiq edildikdən sonra 5 gün müddətində seçki fondunun formalaşdırılması üçün xüsusi seçki hesabı açılır.
Namizəd və ya onun səlahiyyətli nümayəndəsi, siyasi partiyalar, siyasi partiyalar bloku namizəd irəli sürülməsinin təsdiq olunması barədə dairə seçki komissiyasından alınan arayışla birlikdə aşağıdakı sənədlər əlavə edilməklə xüsusi seçki hesabı açırlar:
a) siyasi partiyalar:
- xüsusi seçki hesabının açılması üçün ərizə;
- siyasi partiyanın nizamnaməsinin notariat qaydasında təsdiq edilmiş surəti;
- dövlət qeydiyyatına alınması haqqında sənədin notariat qaydasında təsdiq edilmiş surəti;
- statistika orqanlarında uçot vahidlərinin dövlət reyestrinə daxil edilməsi haqqıda şəhadətnamənin notariat qaydasında təsdiq edilmiş surəti;
- dövlət sosial sığorta orqanında uçota alınması barədə bilidirişin əsli;
- müvafiq vergi orqanı tərəfindən verilmiş şəhadətnamə - dublikatın əsli;
- notariat qaydasında təsdiq edilmiş imza və möhür nümunələri vərəqəsi.
- siyasi partiyalar maliyyə məsələləri üzrə səlahiyyətli nümayəndə təyin edibsə, şəxsiyyətini təsdiq edən sənəd.
b) siyasi partiyalar bloku:
- xüsusi seçki hesabının açılması üçün ərizə;
- siyasi partiyalar blokunun maliyyə məsələləri üzrə səlahiyyətli nümayəndə təyin etdiyi iclasın qərarı;
- maliyyə məsələləri üzrə səlahiyyətli nümayəndənin şəxsiyyətini təsdiq edən sənəd;
- notariat qaydasında təsdiq edilmiş imza və möhür nümunələri vərəqəsi;
c) namizəd:
- xüsusi seçki hesabının açılması üçün ərizə;
- namizədin və ya onun səlahiyyətli nümayəndəsinin şəxsiyyətini təsdiq edən sənəd (əgər xüsusi hesabın açılması səlahiyyətli nümayəndəyə tapşırılıbsa);
3. Yuxarıda göstərilən sənədlər təqdim edildikdən sonra müvafiq bank namizədə dərhal xüsusi seçki hesabı açmalıdır.
4. Namizədlər üçün vahid seçki fondu yaratmaq niyyətində olan siyasi partiyalar Seçki Məcəlləsinin 226.2-ci maddəsinə uyğun hərəkət edirlər. Vahid seçki fondunun ləğv edilməsi Seçki Məcəlləsinin 227-ci maddəsi ilə tənzimlənir.
Vahid seçki fondu xüsusi seçki hesabının açılması qaydasında yaradılır.
5. Namizədlər, siyasi partiyalar, siyasi partiyalar bloku yalnız bir xüsusi seçki hesabı aça bilərlər.
6. Xüsusi seçki hesabı və vahid seçki fondu üzrə bütün əməliyyatlar manatla həyata keçirilir.
7. Müvəkkil bank həftədə bir dəfədən az olmamaq şərtilə, səsvermə gününə 10 gündən az müddət qaldıqda isə 3 iş günü ərzində bir dəfədən az olmamaq şərtilə dairə seçki komissiyasına namizədlərin xüsusi seçki hesabına daxil olan və xərclənən vəsaitlər barədə Təlimatın 1 saylı əlavəsinə uyğun formada məlumat verir.
8. Namizədlərin, siyasi partiyaların, siyasi partiyalar bloklarının seçki fondunda cəmləşən vəsaitlərdən yalnız aşağıdakı məqsədlər üçün istifadə edilə bilər:
a) imza toplanmasına yönəldilmiş təşkilati-texniki tədbirlərin maliyyə təminatı, habelə seçici imzalarının toplanması üçün müvafiq şəxslərə haqq ödənilməsi üçün;
b) seçkiqabağı təşviqatla bağlı tədbirlərin, habelə informasiya və məşvərət xidmətləri dəyərinin ödənilməsi üçün;
c) seçki kampaniyasının keçirilməsi ilə əlaqədar hüquqi şəxslərin və vətəndaşların bilavasitə yerinə yetirdikləri digər işlərin dəyərinin ödənilməsi ilə bağlı xərclər.
9. Namizədlərə təşviqat aparmaq və namizədlərin irəli sürülməsinin müdafiəsi üçün imzaların toplanmasına yönəlmiş təşkilati-texniki tədbirlərin və seçici imzalarının toplanması üçün müvafiq şəxslərin haqqının ödənilməsi üçün seçki fonduna daxil olan vəsaitdən başqa, digər pul vəsaitindən istifadə etmək qadağandır.
10. Xüsusi seçki hesabına vəsaitlər yalnız Seçki Məcəlləsinin 225-ci maddəsində göstərilən məbləğdə və göstərilən şəxslər tərəfindən köçürülə bilər.
11. Yalnız Azərbaycan Respublikasının vətəndaşı olan şəxslər tərəfindən könüllü ianələr Seçki Məcəlləsinin 93.1-ci maddəsində göstərilən qaydada köçürülə bilər.
Hüquqi şəxslərin ianələri yalnız nağdsız qaydada xüsusi seçki hesabına Seçki Məcəlləsinin 93.2-ci maddəsində göstərilən şərtlər nəzərə alınmaqla qəbul edilir.
12. Vətəndaşların və hüquqi şəxslərin könüllü ianələri xüsusi seçki hesabına rabitə şöbələri, banklar və digər kredit təşkilatları vasitəsilə müvafiq ödəniş sənədi alındıqdan sonra ən geçi iki gün ərzində köcürülməlidir.
13. Namizədlərin, siyasi partiyaların və siyasi partiyalar bloklarının seçki fonduna ianələr Seçki Məcəlləsinin 90.2 maddəsində göstərilən buna hüququ olmayan fiziki və ya hüquqi şəxslərdən daxil olubsa, yaxud Seçki Məcəlləsində nəzərdə tutulan məbləğdən artıq köçürülübsə, müvəkkil bank bu Təlimatın 1 saylı əlavəsinə uyğun olaraq müvafiq seçki komissiyasına məlumat verir.
14. Namizədlərin, qeydə alınmış namizədlərin, siyasi partiyaların, siyasi partiya bloklarının seçki fondlarına ianələr buna hüququ olmayan fiziki və hüquqi şəxslərdən daxil olubsa, ianənin xüsusi seçki hesabına daxil olduğu gündən sonrakı 10 gün müddətində namizəd, qeydə alınmış namizəd, siyasi partiya, siyasi partiya bloku ianəni bütünlüklə geri qaytarılmasının səbəbini göstərməklə və göndərmə xərclərini çıxmaqla ianəçiyə qaytarmalıdır.
Azərbaycan Respublikası Seçki Məcəlləsinin 90.2-ci maddəsində göstərilən fiziki və hüquqi şəxslər tərəfindən namizədlərin, qeydə alınmış namizədlərin, siyasi partiyaların, siyasi partiyalar bloklarının seçki fonduna könüllü ianələrin köçürülməsi yolverilməzdir.
Anonim ianələr xüsusi seçki hesabına daxil olduqda Seçki Məcəlləsinin 93.7-ci maddəsinə uyğun olaraq dövlət büdcəsinə köçürülür.
15. Müvəkkil bank bu hallar barədə Mərkəzi Seçki Komissiyasına və dairə seçki komissiyasına hesabat verməlidir.
16. Qeydə alınmış namizədlərin xüsusi seçki hesabları üzrə bütün əməliyyatlar səsvermə günündən sonra 3 iş günü müddətində dayandırılır.
17. Seçki Məcəlləsinin 91.4-cü maddəsində nəzərdə tutulmuş digər hallarda dairə seçki komissiyasının göstərişi ilə müvafiq bank namizədlərin, qeydə alınmış namizədlərin xüsusi seçki hesablarından xərclərin ödənilməsi ilə bağlı maliyyə əməliyyatlarını dayandırır.
18. Maliyyə əməliyyatlarının aparılması müddəti yalnız Seçki Məcəlləsinin 92.1-ci maddəsində müəyyən edilmiş hallarda və əsaslarla Mərkəzi Seçki Komissiyası tərəfindən uzadıla bilər.
19. Bələdiyyə seçkiləri zamanı bələdiyyə üzvlüyünə namizədlərin aldıqları pul vəsaitlərinin geri qaytarılması qaydaları Seçki Məcəlləsinin 90.5 – 90.7-ci maddələri lə müəyyən edilir.
20. Namizədlərin, qeydə alınmış namizədlərin seçki fondlarının xüsusi hesabında qalmış pul vəsaitini dairə seçki komissiyasının yazılı göstərişinə uyğun olaraq müvafiq bank səsvermə günündən 60 gün keçdikdən sonra dairə seçki komissiyasının hesabına köçürməlidir.

Azərbaycan Respublikası Seçki Məcəlləsinin 90.2-ci maddəsində nəzərdə tutulan fiziki və hüquqi şəxslərdən daxil olan ianələr barədə məlumat (1 saylı əlavə)