Azərbaycan Respublikası Mərkəzi Seçki Komissiyasının 25 avqust 2004-cü il tarixli 15/91 saylı Qərarı ilə təsdiq edilmişdir.

Azərbaycan Respublikasında bələdiyyə seçkilərində seçicilərin təşəbbüs qruplarının yaradılması və namizədlərin irəli sürülməsi qaydası haqqında

T Ə L I M A T

1. Azərbaycan Respublikasında bələdiyyə seçkiləri zamanı namizədin və ya namizədlərin irəli sürülməsi Azərbaycan Respublikası Seçki Məcəlləsinin 53-cü, 54-cü və 214-cü maddələri ilə tənzimlənir.
2. Azərbaycan Respublikası Seçki Məcəlləsinin 215-ci maddəsində nəzərdə tutulan qaydada əhalinin sayına nisbətdə:
əhalisi 99.999-dan çox bələdiyyədə - azı 30 nəfərdən,
əhalisi 49.999-dan çox bələdiyyədə - azı 25 nəfərdən,
əhalisi 19.999-dan çox bələdiyyədə - azı 20 nəfərdən,
əhalisi 9.999-dan çox bələdiyyədə - azı 15 nəfərdən,
əhalisi 4.999-dan çox bələdiyyədə - azı 10 nəfərdən,
əhalisi 4.999-dan az olan bələdiyyədə - 5 nəfərdən ibarət olan saydan az olmayaraq təşəbbüs qrupu yaradıla bilər.
3. Təşəbbüs qrupu üzvlərinin müfaviq bələdiyyənin ərazisində yaşamaları faktı əsas götürülür.
4. Aktiv seçki hüququ olan vətəndaşlardan ibarət seçicilərin təşəbbüs qrupu tərəfindən namizəd və ya namizədlər o şərtlə irəli sürülə bilər ki, aşağıda göstərilən sənədlər Azərbaycan Respublikasının Seçki Məcəlləsinə və bu Təlimata uyğun formada müvafiq dairə seçki komissiyasına təqdim edilsin.
5. Bələdiyyəyə namizəd və ya namizədlər irəli sürmək məqsədilə təşəbbüs qrupu yaratmaq istəyən seçicilər tərəfindən yığıncaq keçirilməlidir.
5.1. Yığıncaqdan qabaq təşəbbüs qrupunu yaratmaq istəyən seçicilərə yığıncağın keçirilməsinin yeri və vaxtı barədə məlumat verilir.
5.1.1. Həmin yığıncaqda aşağıdakı məsələlər müzakirə olunur:
5.1.2. bu təlimatın 2-ci bəndinin tələbləri qaydasında, həmin sayda və ya daha çox saydan ibarət seçicilərin təşəbbüs grupunun yaradılması;
5.1.3. namizədin və ya bələdiyyə üzvlərinin sayından az və ya həmin sayda namizədlərin irəli sürülməsi;
5.1.4. namizədliyin irəli sürülməsinin təsdiq edilməsi üçün dairə seçki komissiyasına bildirişlə müraciət edilməsi.
5.2. Göstərilən məsələlər seçicilərin təşəbbüs qrupunun yığıncağında müzakirə edilərək qərarlar çıxarılır və buna dair müvafiq protokol tərtib olunur. Həmin protokolu iclasın sədri və katibi imzalayır.
5.3. Seçicilərin təşəbbüs qrupunun yığıncağının protokolu və bildirişin hər bir vərəqi yığıncağın keçirildiyi yerin ərazi üzrə bələdiyyə qurumu, icra nümayəndəliyi, mənzil istismar sahəsi və digər hüquqi şəxslərin möhürləri ilə təsdiqlənir.
6. Azərbaycan Respublikası Seçki Məcəlləsinin 53-cü maddəsinə və bu təlimata uyğun tərtib edilmiş aşağıda ğöstərilən sənədlər müvafiq dairə komissiyalarına göndərilməlidir:
1) seçicilərin təşəbbüs qrupunun yaradılması barədə yığıncağın protokolu (bu Təlimata 4 saylı əlavə);
2) hər bir namizədin irəli sürülməsinə təşəbbüs edilməsi barədə ayrı-ayrılıqda tərtib edilmiş bildiriş (bu Təlimata 1 “A” saylı əlavə);
3) namizədin və ya namizədlərin Azərbaycan Respublikası Seçki Məcəlləsinin 53-cü maddəsinə uyğun tərtib və notariat qaydada təsdiq edilmiş razılıq ərizəsi (bu Təlimata 2 “A” saylı əlavə);
Namizəd və ya namizədlər tərəfindən səlahiyyətli nümayəndə təyin edilibsə:
4) səlahiyyətli nümayəndənin(lərin) razılıq ərizəsi (bu ərizə notariat qaydasında təsdiq edilməlidir). (Bu Təlimata 3 saylı əlavə);
5) namizəd tərəfindən verilən səlahiyyətli nümayəndənin(lərin) notariat qaydasında təsdiq edilmiş vəkalətnaməsi.

7. Öz təşəbbüsü ilə bələdiyyə üzvlüyünə namizədliyini irəli sürən vətəndaş dairə seçki komissiyasına aşağıdakı sənədləri təqdim etməlidir:
1) bələdiyyəyə namizədliyin irəli sürülməsinə dair bildiriş (bu Təlimata 1 saylı əlavə);
2) namizədin və ya namizədlərin Azərbaycan Respublikasınin Seçki Məcəlləsinin 53-cü maddəsinə uyğun tərtib edilmiş və notariat qaydada təsdiq edilmiş öhdəlik barədə ərizəsi (bu Təlimata 2 “A” saylı əlavə).
Səlahiyyətli nümayəndə təyin edilibsə:
3) səlahiyyətli nümayəndənin(lərin) notariat qaydasında təsdiq edilmiş razılıq ərizəsi (bu Təlimata 3 saylı əlavə);
4) bələdiyyəyə namizəd tərəfindən verilən səlahiyyətli nümayəndənin(lərin) notariat qaydasında təsdiq edilmiş vəkalətnaməsi.

8. Siyasi partiyalar tərəfindən namizəd və ya namizədlər o şərtlə irəli sürülə bilər ki, aşağıda göstərilən sənədlər Azərbaycan Respublikasının Seçki Məcəlləsinə və bu Təlimata uyğun formada müvafiq dairə seçki komissiyasına təqdim edisin:
1) siyasi partiyanın qeydə alınması barədə şəhadətnamənin notariat qaydasında təsdiqlənmiş surəti;
2) siyasi partiyanın qüvvədə olan nizamnaməsinin notariat qaydasında təsdiqlənmiş surəti;
3) namizədin irəli sürülməsi barədə siyasi partiyanın qurultayının (konfransının, rəhbər orqanın iclasının) qərarı və müvafiq iclasın protokolu;
4) siyasi partiyaların, səlahiyyətli nümayəndələrinin siyahısı (bu siyahı həmcinin Mərkəzi Seçki Komissiyasına da təqdim olunur) (bu Təlimata 4 “A” saylı əlavə olunur). Həmcinin maliyyə məsələləri üzrə səlahiyyətli nümayəndələrin siyahısı;
5) səlahiyyətli nümayəndənin razılıq məktubu (bu Təlimata 3 saylı əlavə).
6) siyasi partiyanın səlahiyyətli nümayəndələrinin notariat qaydasında rəsmiləşdirilmiş vəkalətnamələri;
7) bələdiyyəyə namizədliyin irəli sürülməsinə dair bildiriş (bu Təlimata 1 saylı əlavə);
8) namizədin razılıq ərizəsi (bu Təlimata 2 “A” saylı əlavə);

9. Azərbaycan Respublikası Seçki Məcəlləsinin 50-ci maddəsinə müvafiq olaraq siyasi partiyalar blokunun qeydə alınması üçün onun səlahiyyətli nümayəndəsi aşağıda göstərilən sənədləri Azərbaycan Respublikası Seçki Məcəlləsinə uyğun formada Mərkəzi Seçki Komissiyasına təqdim etməlidir:
1) bloka daxil olan siyasi partiyaların nizamnamələrinin notariat qaydasında təsdiq edilmiş surətləri;
2) siyasi partiyaların bloka daxil olmaq haqqında qərarları;
3) blokun yaradılması haqqında siyasi partiyaların səlahiyyətli nümayəndələri tərəfindən imzalanmış və həmin partiyaların möhürləri ilə təsdiqlənmiş birgə qərar.

10. Siyasi partiyalar bloku tərəfindən namizəd və ya namizədlər o şərtlə irəli sürülə bilər ki, aşağıda göstərilən sənədlər Azərbaycan Respublikası Seçki Məcəlləsinə və bu Təlimata uyğun formada müvafiq dairə seçki komissiyasına təqdim edisin:
1) siyasi partiyaların blokuna daxil olan siyasi partiyaların nümayəndələrinin iclasının (qurultayının, konfransının) siyasi partiyaların bloku adından namizəd irəli sürülməsi haqqında qərarı və müvafiq iclasın protokolu;
2) siyasi partiyalar blokunun səlahiyyətli nümayəndələrinin notariat qaydasında rəsmiləşdirilmiş vəkalətnamələri;
3) siyasi partiyalar blokunun səlahiyyətli nümayəndələrinin siyahısı. Bu siyahı həmcinin Mərkəzi Seçki Komissiyasına da təqdim edilməlidir (bu Təlimata 4 saylı əlavə olunur). Həmcinin maliyyə məsələləri üzrə səlahiyyətli nümayəndələrin siyahısı;
4) səlahiyyətli nümayəndələrin razılıq məktubu (Təlimata 3 “A” saylı əlavə);
5) bələdiyyəyə namizədliyin irəli sürülməsinə dair bildiriş (bu Təlimata 1 saylı əlavə);
6) namizədin razılıq ərizəsi (bu Təlimata 2 “A” saylı əlavə);

_________

Bələdiyyəyə namizədliyin irəli sürülməsinə dair bildiriş (1 saylı əlavə)

Hər bir namizədin irəli sürülməsinə təşəbbüs edilməsi barədə ayrı-ayrılıqda tərtib edilmiş bildiriş (1 “A” saylı əlavə)

Namizədin və ya namizədlərin Azərbaycan Respublikasınin Seçki Məcəlləsinin 53-cü maddəsinə uyğun tərtib edilmiş və notariat qaydada təsdiq edilmiş öhdəlik barədə ərizəsi ( 2 saylı əlavə)

Namizədin və ya namizədlərin Azərbaycan Respublikasınin Seçki Məcəlləsinin 53-cü maddəsinə uyğun tərtib edilmiş və notariat qaydada təsdiq edilmiş razılıq ərizəsi ( 2 “A” saylı əlavə)

Səlahiyyətli nümayəndənin razılıq ərizəsi (3 saylı əlavə)

Səlahiyyətli nümayəndələrin razılıq məktubu (3 “A” saylı əlavə)

Seçicilərin təşəbbüs qrupunun yaradılması və bələdiyyə üzvlüyünə namizədin irəli sürülməsi barədə yığıncağın Protokolu( 4 saylı əlavə)

Siyasi partiyanın, siyasi partiyalar blokunun səlahiyyətli nümayəndələrinin Siyahısı (4 “A” saylı əlavə olunur)