Azərbaycan Respublikası
Mərkəzi Seçki Komissiyasının 23 iyun 2004-cü
il tarixli 06/44
saylı qərarı ilə təsdiq edilmişdir.
Azərbaycan Respublikasının Milli Məclisinə seçkilərdə
seçicilərin təşəbbüs qruplarının yaradılması,
vətəndaşın öz təşəbbüsü və ya seçicilərin təşəbbüs
qrupunun deputatlığa namizədi irəli sürmələri
qaydaları haqqında
T ə l i m a t
1.1. Azərbaycan
Respublikası Milli Məclisinə seçkilər zamanı
deputatlığa namizədin irəli sürülməsi Azərbaycan
Respublikasının Seçki Məcəlləsinin 53-cü və
146-cı maddələri ilə nizama salınır.
1.2. Seçki dairəsi üzrə təkrar seçkilərdə namizədlər
bu seçkilərin təyin edilməsi haqqında qərar
rəsmi dərc olunduqdan sonra irəli sürülür.
1.3. Əlavə seçkilərdə namizədlər Azərbaycan
Respublikası Seçki Məcəlləsinin 145.4-cü maddəsində
göstərilən müddətdən, yəni seçkilərin təyin
edilməsi barədə qərar onun qəbul edildiyi gündən
başlayaraq ən geci 2 gün ərzində kütləvi informasiya
vasitələrində rəsmi dərc edildikdən sonra irəli
sürülür.
1.4. Seçki hüququ olan hər bir vətəndaş, yaxud
vətəndaşlar Milli Məclisə deputatlığa namizədləri
irəli sürmək üçün azı 50 nəfərdən ibarət olan
seçicilərin təşəbbüs qrupunu yarada bilərlər.
2. Namizədin öz təşəbbüsü və ya aktiv seçki
hüququ olan vətəndaşlar tərəfindən namizədliyi
o şərtlə irəli sürülə bilər ki, aşağıda göstərilən
sənədlər bu Təlimata əlavə olunmuş nümunələrə
uyğun formada müvafiq dairə seçki komissiyasına
təqdim edilsin.
3. Namizəd və yaxud, namizədi irəli sürən seçicilərin
təşəbbüs qrupu öz təşəbbüsü barədə dairə seçki
komissiyasına yazılı bildiriş verir. Bildirişdə
namizədi irəli sürən hər bir təşəbbüsçünün və
namizədin soyadı, adı, atasının adı, doğum tarixi,
yaşayış yerinin ünvanı, şəxsiyyət vəsiqəsinin
və ya onu əvəz edən sənədin seriyası və nömrəsi,
bundan başqa irəli sürülən namizədin əsas iş
və ya xidmət yeri, tutduğu vəzifəsi (bu olmadıqda
– fəaliyyət növü) göstərilməlidir.
4. Deputatlığa namizəd irəli sürmək məqsədi
ilə təşəbbüs qrupu yaratmaq istəyən seçicilər
tərəfindən yığıncaq keçirilir. İclasdan qabaq
təşəbbüs qrupunu yaratmaq istəyən seçicilərə
yığıncağın keçirilməsinin yeri və vaxtı barədə
məlumat verilir. Təşəbbüs qrupunun üzvlərinin
müfaviq seçki dairəsinin ərazi vahidlərində
yaşamaları faktı əsas götürülür.
4.1. Həmin yığıncaqda aşağıdakı məsələlər müzakirə
olunur:
- azı 50 nəfərdən ibarət olan seçicilərin təşəbbüs
qrupunun yaradılması;
- deputatlığa namizədin irəli sürülməsi;
- seçicilərin təşəbbüs qrupu kimi qeydə alınması
və deputatlığa namizədliyi İrəli sürülən şəxsin
qeydə alınması barədə qərar verilməsi üçün dairə
seçki komissiyasına bildirişlə müraciət edilməsi.
4.2. Göstərilən məsələlər seçicilərin təşəbbüs
qrupunun yığıncağında müzakirə edilərək qərarlar
çıxarılır və protokol tərtib olunur. Həmin protokolu
iclasın sədri və katibi imzalayır.
4.3. Seçicilərin təşəbbüs qrupunun yığıncağının
protokolu və bildirişin hər bir vərəqi, əgər
yığıncaq müəssisə, idarə və ya təşkilatda keçirilirsə,
həmin təşkilat, idarə və ya müəssisənin möhüründən
istifadə etməklə, əgər yığıncaq seçicilərin
yaşayış yeri üzrə keçirilirsə, mənzil istismar
sahəsinin və ya müvafiq bələdiyyələrin möhüründən
istifadə etməklə təsdiqlənir.
4.4. Dairə seçki komissiyasına öz təşəbbüsü
ilə deputatlığa namizədliyi irəli sürən vətəndaş
aşağıdakı sənədlər təqdim etməlidir:
1) deputatlığa namizədliyin irəli sürülməsinə
dair bildiriş (bildirişin nümunəsi bu Təlimata
əlavə edilir);
2) deputatlığa namizədin şəxsiyyət vəsiqəsi
və ya onu əvəz edən sənədin surəti (bu sənəd
notariat qaydada təsdiq edilməlidir);
3) deputatlığa namizədin ərizəsi (Deputatlığa
namizədliyi irəli sürülən şəxsin soyadı, adı,
atasının adı, doğum tarixi, Azərbaycan Respublikasının
ərazisində daimi yaşaması və yaşadığı yer, şəxsiyyət
vəsiqəsinin və ya onu əvəz edən sənədin seriyası
və nömrəsi, iş və ya xidmət yeri, tutduğu vəzifəsi
(bu olmadıqda fəaliyyət növü), partiyalılığı,
namizədliyə irəli sürülməsi haqqında razılıq
ərizəsində göstərilməlidir (bu ərizə notariat
qaydada təsdiq edilməlidir). Namizəd öz ərizəsinə
siyasi partiyaya mənsubiyyəti barədə məlumatları
daxil edə bilər. Belə halda namizəd mənsub olduğu
siyasi partiyanın 5 sözdən çox olmayan adla
adlandırılmasını dairə seçki komissiyası ilə
razılaşdırır. Ərizədə göstərilmiş siyasi partiya
namizədi öz sıralarından xaric edibsə və dairə
seçki komissiyasına bildiriş göndəribsə, həmin
bildiriş alındıqdan sonra həmin namizədlə əlaqədar
siyasi partiyanın adından istifadə edilə bilməz;
4) Öhdəlik barədə ərizə (bu ərizədə namizəd
deputat seçilcəyi halda həmin vəzifə ilə uzlaşmayan
fəaliyyətə xitam verəcəyi barədə öhdəlik götürməsini
qeyd edir. Bu ərizədə onun tərcümeyi-halına
aid məlumatlar (soyadı, adı, atasının adı, doğum
tarixi, yaşayış yerinin ünvanı, təhsili, əsas
iş və ya xidmət növü) göstərilməlidir. Namizədin
ödənilməmiş və ya üzərindən götürülməmiş Cinayət
Məcəlləsinin müvafiq maddəsinin adı və nömrəsi,
namizədin xarici ölkədə cinayət məsuliyyəti
yaradan əməli olmuşdursa və bu halda qanuni
qüvvəyə minmiş məhkəmə hökmü çıxarılmışdırsa
və bu əməl Azərbaycan Respublikasının Cinayət
Məcəlləsində nəzərdə tutulan cinayət məsuliyyəti
yaradırsa, xarici ölkənin müvafiq qanunun adı
göstərilməlidir. Namizədin ərizəsində Azərbaycan
Respublikasının vətəndaşlığı haqqında məlumatla
yanaşı, xarici ölkə vətəndaşlığının və başqa
ölkələr qarşısında öhdəliklərin olub-olmaması
da göstərilməlidir.
Səlahiyyətli nümayəndə təyin edilibsə:
5) səlahiyyətli nümayəndənin(lərin) razılıq
ərizəsi (bu ərizə notariat qaydada təsdiq edilməlidir);
6) deputatlığa namizədin səlahiyyətli nümayəndəsinin(lərinin)
siyahısı;
7) deputatlığa namizəd tərəfindən verilən səlahiyyətli
nümayəndənin(lərin) vəkalətnaməsi (vəkalətnamə
notariat qaydada təsdiq edilməlidir);
4.5. deputatlığa namizədin seçicilərin təşəbbüs
qrupu tərəfindən irəli sürülməsi üçün bu Təlimatın
4.4 bəndində göstərilən sənədlərlə birlikdə
(bu Təlimatın 4.4-cü bəndinin 1-ci hissəsi istisna
olmaqla) aşağıda göstərilən sənədlər əlavə edilməlidir:
1) seçicilərin təşəbbüs qrupunun yaradılması
barədə yığıncağın protokolu (protokolun nümunəsi
bu Təlimata əlavə edilir);
2) Azərbaycan Respublikasının Milli Məclis seçkilərində
namizəd irəli sürülməsinə təşəbbüs edilməsi
barədə bildiriş (bildirişin nümunəsi bu Təlimata
əlavə edilir);
3) seçicilərin təşəbbüs qrupu üzvlərinin siyahısı
(siyahıda üzvlərin soyadı, adı, atasının adı,
doğum tarixi, yaşadığı yerin ünvanı, şəxsiyyət
vəsiqəsinin və ya onu əvəz edən sənədin seriyası
və nömrəsi, imzası göstərilməlidir);
5. Dairə seçki komissiyası tərəfindən təqdim
edilmiş sənədlərin alınması barədə deputatlığa
namizədə və ya onun səlahiyyətli nümayəndəsinə
yazılı arayış verilməlidir.
6. Dairə seçki komissiyası təqdim edilmiş sənədlərə
5 gün müddətində baxır deputatlığa namizədə
və ya onun səlahiyyətli nümayəndəsinə namizədin
irəli sürülməsini təsdiq olunub-olunmadığı barədə
qərar təqdim edir.
