Azərbaycan Respublikası
Mərkəzi Seçki Komissiyasının
21 iyun 2003-cü il tarixli
3/16 saylı qərarı ilə təsdiq
edilmişdir

Azərbaycan Respublikası Prezidentinin seçkilərində namizədə, onun səlihiyyətli nümayəndəsinə, seçicilərin təşəbbüs qruplarına, siyasi partiyanın, siyasi partiyalar blokunun səlahiyyətli nümayəndələrinə Azərbaycan Respublikasının Mərkəzi Seçki Komissiyası tərəfindən imza vərəqələri verilməsi

QAYDALARI

Seçicilərin təşəbbüs qruplarının irəli sürdükləri və ya öz təşəbbüsü ilə irəli sürülən namizədlərin müdafiəsi məqsədilə seçici imzalarının toplanması Azərbaycan Respublikası Mərkəzi Seçki Komissiyası tərəfindən namizədə, onun səlahiyyətli nümayəndəsinə Azərbaycan Respublikası prezidentliyinə namizədin irəli sürülməsini təsdiq edən qərarın təqdim edildiyi gündən başlanır.
Siyasi partiya, siyasi partiyaların bloku tərəfindən irəli sürülən namizədlərin müdafiəsi üçün seçici imzalarının toplanması isə irəli sürülmüş namizədin təsdiq olunması barədə Mərkəzi Seçki Komissiyasının əsaslandırılmış qərarından sonra başlanılır.
Namizədə, onun səlahiyyətli nümayəndəsinə, seçicilərin təşəbbüs qrupların, siyasi partiyanın, siyasi partiyalarının blokunun səlahiyyətli nümayəndələrinə imza vərəqələri verilərkən hər bir imza vərəqəsinin yuxarı sağ küncü Mərkəzi Seçki Komissiyası Katibliyinin möhürü ilə təsdiqlənməlidir.
İmza vərəqələri Azərbaycan Respublikasının Seçki Məcəlləsinə 2 və 2 “A” əlavələrdə göstərilən formada hazırlanmalıdır.
İmza vərəqələri namizədə, onun səlahiyyətli nümayəndəsinə, seçicilərin təşəbbüs qrupuna, siyasi partiyanın, siyasi partiyalar blokunun səlahiyyətli nümayəndələrinə verilərkən, namizədlərin irəli sürülməsi zamanı onların bərabər statusunun təmin edilməsi məqsədilə, vərəqələrin sayı Azərbaycan Respublikasının Seçki Məcəlləsi ilə müəyyənləşdirilmiş qeydiyyat üçün lazım olan imzaların ümumi sayının 15 faizindən artıq olmamalıdır.
Namizədə və ya səlahiyyətli nümayəndəyə imza vərəqələri verilərkən 2 nüsxədən ibarət akt tərtib edilməlidir. Tərtib olunmuş akt namizəd və ya səlahiyyətli nümayəndə, eləcə də Mərkəzi Seçki Komissiyası Katibliyinin əməkdaşı tərəfindən imzalandıqdan sonra Mərkəzi Seçki Komissiyası Katibliyinin möhürü ilə təsdiqlənir.
İmza vərəqələrini qəbul etməsi haqqında namizədin və ya səlahiyyətli nümayəndənin soyadı, adı, atasının adı, şəxsiyyətini təsdiq edən sənədin seriyası və nömrəsi, eləcə də səlahiyyətli nümayəndə olduğunu təsdiqləyən sənədin nömrəsi və verilmə tarixi, həmçinin Mərkəzi Seçki Komissiyası Katibliyi əməkdaşının soyadı, adı, atasının adı, tutduğu vəzifə, verilən imza vərəqələrinin sayı və digər məlumatlar göstərilməlidir. Tərtib edilmiş akt imzalanaraq möhürləndikdən sonra onun bir nüsxəsi Mərkəzi Seçki Komissiyası Katibliyinin Ümumi şöbəsində qalır. Digər nüsxəsi isə verilən imza vərəqələri ilə birlikdə səlahiyyətli nümayəndəyə və ya namizədə təqdim edilir.