Azərbaycan Respublikası
Mərkəzi Seçki Komissiyasının
21 iyun 2003-cü il tarixli
3/13 saylı qərarı ilə təsdiq
edilmişdir.

Azərbaycan Respublikasının
Milli Bankı ilə razılaşdırılmışdır.

Prezidentliyə namizədlərin, qeydə alınmış prezidentliyə namizədlərin, siyasi partiyaların və siyasi partiya bloklarının xüsusi seçki hesablarının açılması və aparılması haqqında

T Ə L İ M A T

Bu Təlimat Azərbaycan Respublikasının Seçki Məcəlləsinə (bundan sonra ─ Seçki Məcəlləsi) və "Azərbaycan Respublikası Seçki Məcəlləsinin tətbiq edilməsi barədə" Azərbaycan Respublikası Prezidentinin 3 iyun 2003-cü il tarixli Fərmanına uyğun olaraq hazırlanıb və prezidentliyə namizədlərin, qeydə alınmış prezidentliyə namizədlərin, siyasi partiyaların və siyasi partiyalar bloklarının xüsusi seçki hesablarının açılması və aparılması qaydalarını müəyyən edir.
1. Prezidentliyə namizədlər (bundan sonra namizədlər) və ya onların səlahiyyətli nümayəndələri Mərkəzi Seçki Komissiyasına bildiriş (bu Təlimatın 1 saylı əlavəsinə uyğun formada) təqdim etdikdən və ya siyasi partiyalar, siyasi partiyaların bloku tərəfindən namizəd irəli sürülməsi haqqında müvafiq qərarı təqdim etdikdən sonra, lakin namizədlərin qeydə alınmaq üçün Mərkəzi Seçki Komissiyasına təqdim edilməsi gününə azı 5 gün qalmış seçki fondunu formalaşdırmaqdan ötrü xüsusi seçki hesabı açmalıdırlar. Prezidentliyə namizəd irəli sürülməsi barədə Mərkəzi Seçki Komissiyasından alınan sənəd əsasında, Seçki Məcəlləsinin 53-cü və 54-cü maddələrində göstərilən sənədlər əlavə edilməklə Birləşmiş Universal Səhmdar Bankında xüsusi seçki hesabı açır.
Bunun üçün prezidentliyə namizədlər, qeydə alınmış prezidentliyə namizədlər, siyasi partiyaların və siyasi partiyalar blokları müvafiq banka müraciət edib, aşağıdakı sənədləri təqdim etməlidirlər:
- xüsusi hesabın açılması üçün ərizə;
- prezidentliyə namizədlərin, qeydə alınmış prezidentliyə namizədlərin və ya onların səlahiyyətli nümayəndələrinin şəxsiyyətini təsdiq edən sənəd;
- notariat qaydasında təsdiq edilmiş imza nümunəsi (xüsusi hesabın açılması və xüsusi seçki fondunda olan pul vəsaitlərindən istifadə namizəd tərəfindən başqa şəxsə həvalə edildikdə, həmin şəxsin imzasının notariat qaydasında təsdiq edilmiş surəti).
2. Rəsmiləşdirilmiş sənədlər təqdim edildikdə müvafiq bank namizədə 3 gün müddətində xüsusi seçki hesabı açmalıdır. Hesabın açılmasına və hesab üzrə əməliyyatlara görə haqq alınmır, hesabda olan pul vəsaitindən istifadəyə görə banka faiz ödənilmir. Bütün pul vəsaiti xüsusi seçki hesabına manatla köçürülür.
3. Prezidentliyə namizədlər, qeydə alınmış namizədlər, siyasi partiyalar və siyasi partiyaların blokları yalnız bir xüsusi hesab aça bilərlər.
4. Müvafiq bank həftədə bir dəfədən az olmamaq şərti ilə, səsvermə gününə 10 gündən az müddət qaldıqda isə 3 bank günü ərzində bir dəfədən az olmamaq şərti ilə Mərkəzi Seçki Komissiyasına prezidentliyə namizədlərin, qeydə alınmış prezidentliyə namizədlərin xüsusi seçki hesablarına daxil olan və xərclənən vəsaitlər barədə bu Təlimatın 2 saylı əlavəsinə uyğun formada məlumat verir.
5. Prezidentliyə namizədlərin seçki fondu məbləğinin yuxarı həddi seçkilərin təyin edilməsi haqqında qərarın rəsmi dərc edildiyi günə olan minimum əmək haqqının 200 min mislindən çox ola bilməz. Namizədin qeydə alınması üçün müvafiq seçki komissiyasına seçki sənədləri təqdim edilərkən, eyni zamanda, qeydiyyatı həyata keçirən seçki komissiyasının hesabına (yəni Mərkəzi Seçki Komissiyasının hesabına) seçki fondunun yuxarı həddinin 3 faizi məbləğində könüllü qeydiyyat depozitinin köçürülməsi barədə bank sənədi təqdim edilə bilər. Qeydiyyat depozitinin seçki komissiyası tərəfindən geri qaytarılması halları Seçki Məcəlləsinin 60.5-ci maddəsi ilə müəyyən edilir.
6. Prezidentliyə namizədlərin, qeydə alınmış prezidentliyə namizədlərin, siyasi partiyaların və siyasi partiyalar bloklarının seçki fondlarında cəmləşən vəsaitlərdən yalnız Seçki Məcəlləsinin 90-cı maddəsinin 3.1, 3.2 və 3.3-cü bəndlərində müəyyən edilmiş məqsədlər üçün istifadə edilə bilər.
7. Namizədlərə, qeydə alınmış namizədlərə təşviqat və imzaların yığılması üçün seçki fondlarına daxil olan vəsaitdən başqa, digər pul vəsaitindən istifadə etmək qadağandır.
8. Xüsusi seçki hesablarına vəsaitlər yalnız Seçki Məcəlləsinin 191-ci maddəsində göstərilən məbləğdə və göstərilən şəxslər tərəfindən köçürülə bilər.
9. Yalnız Azərbaycan Respublikasının vətəndaşları olan fiziki şəxslər tərəfindən könüllü ianələr Seçki Məcəlləsinin 93.1-ci maddəsində müəyyənləşdirilmiş qaydada köçürülə bilər.
Hüquqi şəxslərin ianələri yalnız nağdsız qaydada xüsusi seçki hesablarına Seçki Məcəlləsinin 93.2-ci maddəsində göstərilən şərtlər nəzərə alınmaqla qəbul edilir.
10. Vətəndaşların və hüquqi şəxslərin könüllü ianələri xüsusi seçki hesabına rabitə şöbələri və ya bank-kredit təşkilatları vasitəsilə müvafiq ödəniş sənədi alındıqdan sonra növbəti bank günündən gec olmayaraq köçürülür. Bu halda nağdsız ödənişin həyata keçirilməsinin ümumi müddəti 2 gündən artıq ola bilməz.
11. Namizədlərin, qeydə alınmış namizədlərin, siyasi partiyaların və siyasi partiya bloklarının seçki fondlarına ianələr buna hüququ olmayan, Seçki Məcəlləsinin 90.2-ci maddəsində göstərilən vətəndaşlardan və ya hüquqi şəxslərdən daxil olubsa, yaxud bu Məcəllədə nəzərdə tutulmuş məbləğdən artıq köçürülübsə, ianənin xüsusi hesaba daxil olduğu gündən sonrakı 10 gün müddətində namizəd, qeydə alınmış namizəd, siyasi partiya, siyasi partiyalar bloku ianəni bütünlüklə və ya onun müəyyənləşdirilmiş yuxarı həddi aşan hissəsini, geri qaytarılmanın səbəbini göstərməklə və göndərilmə xərclərini çıxmaqla, ianəçiyə qaytarmalıdır.
12. Prezidentliyə namizəd Mərkəzi Seçki Komissiyasında müəyyən olunmuş qaydada qeydiyyata alındıqdan və bank rekvizitlərini təqdim etdikdən sonra Dövlət büdcəsindən ayrılmış vəsait 3 gün ərzində Mərkəzi Seçki Komissiyası tərəfindən onun xüsusi hesabına köçürülür.
13. Anonim ianələr xüsusi seçki hesabına daxil olduğu gündən sonra 10 gün müddətində namizəd, qeydə alınmış namizəd tərəfindən dövlət büdcəsinə köçürülür.
14. Qeydə alınmış namizədlərin xüsusi seçki hesabları üzrə bütün əməliyyatları səsvermə günündən sonra 3 gün müddətində dayandırılır.
15. Seçki Məcəlləsinin 91.4-cü maddəsində nəzərdə tutulmuş digər hallarda Mərkəzi Seçki Komissiyasının göstərişi ilə müvafiq bank namizədlərin, qeydə alınmış namizədlərin xüsusi seçki hesablarından xərclərin ödənilməsi ilə bağlı maliyyə əməliyyatlarını dayandırır.
16. Maliyyə əməliyyatlarının aparılması müddəti yalnız Seçki Məcəlləsinin 92.1-ci maddəsində müəyyən edilmiş hallarda və əsaslarla uzadıla bilər.
17. Prezident seçkiləri zamanı prezidentliyə namizədlərin, qeydə alınmış prezidentliyə namizədlərin aldıqları pul vəsaitlərinin geri qaytarılmasının qaydaları Seçki Məcəlləsinin 90.5 ─ 90.7-ci maddələri ilə müəyyən edilir.
18. Prezidentliyə namizədlərin, qeydə alınmış prezidentliyə namizədlərin seçki fondlarının xüsusi hesabında qalmış pul vəsaitini Mərkəzi Seçki Komissiyasının yazılı göstərişinə uyğun olaraq müvafiq bank səsvermə günündən 60 gün keçdikdən sonra onun hesabına köçürməlidir.
19. Səsvermədə iştirak etmiş, lakin seçicilərin ümumi sayının 5 faizdən az səsini toplamış qeydə alınmış prezidentliyə namizəd Mərkəzi Seçki Komissiyasının onun seçki fonduna köçürdüyü pul vəsaitini səsvermə günündən sonra 30 gün müddətində tam həcmdə Mərkəzi Seçki Komissiyasının hesabına köçürməlidir.
20. Səsvermədə iştirak etmiş və seçicilərin ümumi sayının azı 5 faizinin səsini toplamış qeydə alınmış prezidentliyə namizəd və ya seçilən sayılmış, habelə səsvermə gününədək Seçki Məcəlləsinin 73.3-cü maddəsində göstərilən məcburedici hallara görə namizədliyini geri götürmüş qeydə alınmış prezidentliyə namizəd səsvermə günündən 30 gün müddətində, onun seçki fonduna Mərkəzi Seçki Komissiyasının köçürdüyü vəsaitin xərclənməmiş hissəsini həmin seçki komissiyasına qaytarmağa borcludur. Bu müddət başa çatdıqda müvafiq bank Mərkəzi Seçki Komissiyasının məktubunda göstərilmiş pul vəsaitini mübahisəsiz qaydada Komissiyanın hesabına köçürməlidir.