Azərbaycan Respublikası Mərkəzi Seçki
Komissiyasının 8 sentyabr 2003-cü il tarixli
29/228 saylı Qərarı ilə təsdiq edilmişdir.

Dairə seçki komissiyalarının
nəzarət-təftiş xidməti haqqında

Əsasnamə

Bu Əsasnamə Azərbaycan Respublikası Prezidentinin seçkilərində, Azərbaycan Respublikası Milli Məclisi deputatlarının seçkilərində, referendumda və bələdiyyələrə seçkilərdə dairə seçki komissiyalarının nəzarət-təftiş xidmətinin hüquqi vəziyyətini, vəzifələrini, fəaliyyət qaydalarını müəyyən edir.

I. Ümumi müddəalar

1.1. Dairə seçki komissiyasında nəzarət-təftiş xidməti Azərbaycan Respublikası Seçki Məcəlləsinin 97-ci maddəsinə uyğun olaraq yaradılır.
1.2. Nəzarət-təftiş xidmətinin tərkibinə dairə seçki komissiyasının təmsilçilik norması üzrə 3 nəfər komissiya üzvü (Milli Məclisdə çoxluq təşkil edən siyasi partiyaları, azlıq təşkil edən siyasi partiyaları və bitərəfləri təmsilçilik üzrə) və müvafiq dövlət orqanlarının: Azərbaycan Respublikasının Maliyyə Nazirliyi rayon şöbələrinin, Azərbaycan Respublikası Vergilər Nazirliyinin ərazi vergi idarələrinin və Bakı şəhər vergilər departamentinin, Birləşmiş Universal Səhmdar Bankı şöbələrinin əməkdaşları daxil edilir.
1.3. Nəzarət-təftiş xidməti dairə seçki komissiyasının səlahiyyəti müddətində təşkil olunur.
1.4. Nəzarət-təftiş xidməti öz fəaliyyətində Azərbaycan Respublikasının Seçki Məcəlləsini, Mərkəzi Seçki Komissiyasının qəbul etdiyi normativ xarakterli aktları, Mərkəzi Seçki Komissiyasının qərarlarını, Azərbaycan Respublikasının digər qanunvericilik aktlarını və bu Əsasnaməni rəhbər tutur.
1.5. Nəzarət-təftiş xidmətinin rəsmi yazışmaları üçün dairə seçki komissiyasının blankından istifadə olunur.

II. Nəzarət-təftiş xidmətinin vəzifələri

2.1. Nəzarət-təftiş xidməti seçki komissiyalarına ayrılmış pul vəsaitinin təyinatı üzrə istifadəsinə, seçki fondları vəsaitinin düzgün qeydə alınmasına və ondan istifadə olunmasına nəzarəti həyata keçirir.

III. Nəzarət-təftiş xidmətinin funksiyaları

3.1. Dairə seçki komissiyasının tapşırığı ilə nəzarət-təftiş xidməti:
3.1.1. aşağı seçki komissiyalarının maliyyə hesabatını yoxlayır;
3.1.2. seçkilərin maliyyyələşdirilməsində məntəqə seçki komissiylarında yol verilmiş maliyyə pozuntuları barədə müvafiq sənədlər təqdim edir;
3.1.3. seçkilərin maliyyələşdirilməsinin qanunvericiliyə uyğun aparılması ilə bağlı digər məsələləri yoxlayır;
3.1.4. yoxlamaların nəticələri haqqında akt yaxud arayış tərtib edir və dairə seçki komissiyasının sədrinə təqdim edir.

IV. Nəzarət-təftiş xidmətinin hüquqları

4.1. Nəzarət-təftiş xidmətinin hüquqları:
4.1.1. məntəqə seçki komissiyasından öz səlahiyyətlərinə aid bütün məsələlər üzrə məlumat, arayış tələb etmək;
4.1.2. icra hakimiyyəti orqanlarından, bələdiyyə qurumlarından, mülkiyyət formasından asılı olmayaraq təşkilatlardan, vətəndaşlardan nəzarət-təftiş xidmətinə aid məsələlər barəsində, seçkilərin maliyyə təminatı ilə əlaqədar olan zəruri arayış və məlumatlar almaq;
4.1.3. seçkilərin maliyyələşdirilməsində yol verdikləri pozuntulara görə vətəndaşlara və hüquqi şəxslərə, namizədlərə, qeydə alınmış namizədlərə, siyasi partiyalara, siyasi partiyaların bloklarına, referendum üzrə təşviqat qruplarına qarşı müvafiq məsuliyyət tədbirlərinin tətbiq edilməsi haqqında dairə seçki komissiyası və ya Mərkəzi Seçki Komissiyası qarşısında məsələ qaldırmaq.

V. Nəzarət-təftiş xidmətinin formalaşdırılması qaydası

5.1. Nəzarət-təftiş xidmətinin rəhbəri dairə seçki komissiyasının qərarı ilə təyin və azad edilir.
5.2. Nəzarət-təftiş xidmətinin üzvləri müvafiq dövlət orqanlarının rəhbərləri ilə razılaşdırılmaqla dairə seçki komissiyası tərəfindən xidmətin tərkibinə daxil edilirlər. Seçkilərin təyin olunması haqqında qərarın rəsmi dərc edildiyi gündən başlayaraq nəzarət-təftiş xidmətinin tərkibinə daxil edilmək üçün müvafiq orqanlar tərəfindən dairə seçki komissiyasının sərəncamına tələb edilən vaxtadək müvafiq mütəxəssislər göndərilməlidir. Nəzarət-təftiş xidmətinin üzvləri əsas işlərindən azad edildikdə, əsas iş yerləri üzrə əmək haqqları və digər ödənişlər saxlanılmaqla Mərkəzi Seçki Komissiyasının müəyyən etdiyi qaydada və həcmdə əlavə əmək haqqı alırlar.
5.3. Nəzarət-təftiş xidmətinin tərkibinə daxil edilən mütəxəssislər nəzarət-təftiş xidməti rəhbərinin təqdimatı əsasında dairə seçki komissiyası sədrinin sərəncamı ilə və dairə seçki komissiyasının hesabına xidməti ezamiyyəyə göndərilə bilər.

VI. Nəzarət-təftiş xidməti rəhbərinin hüquq və vəzifələri

6.1. Nəzarət-təftiş xidmətinin rəhbəri:
6.1.1. nəzarət-təftiş xidmətinin fəaliyyətini təşkil edir və onun fəaliyyəti barədə dairə seçki komissiyasına hesabat verir;
6.1.2. nəzarət-təftiş xidmətinin tərkibinə daxil olan şəxslər və həmin xidmətin işinə cəlb olunan mütəxəssislər arasında vəzifə bölgüsü aparır, onlara tapşırıqlar verir və onların icrasına nəzarət edir;
6.1.3. müvafiq idarə və təşkilatlara sorğular verir, məlumatlar alır;
6.1.4. dairə seçki komissiyasının tapşırığı ilə yoxlamaların keçirilməsi və ekspert rəylərinin hazırlanması üçün ekspertləri cəlb edir.

VII. Yekun müddəalar

7.1. Bu Əsasnamə Azərbaycan Respublikasının Mərkəzi Seçki Komissiyası tərəfindən qəbul edilir.
7.2. Bu Əsasnaməyə əlavə və dəyişikliklər Mərkəzi Seçki Komissiyasının qərarı ilə edilə bilər.