Azərbaycan Respublikası
Mərkəzi Seçki Komissiyasının
21 iyun 2003-cü il tarixli
3/09 saylı Qərarı ilə təsdiq edilmişdir.

Seçicilərin təşəbbüs qruplarının yaradılması və onların
prezidentliyə namizədi irəli sürmələri qaydaları haqqında

T ə l i m a t

Azərbaycan Respublikası Prezidentinin seçkiləri zamanı prezidentliyə namizədin irəli sürülməsi Azərbaycan Respublikasının Seçki Məcəlləsinin 53-cü, 54-cü və 180-ci maddələri ilə nizama salınır.
Seçkilərin təyin edilməsi haqqında qərar rəsmi dərc olunduqdan sonra prezidentliyə namizədlər irəli sürülür.
Seçki Məcəlləsinin 180-ci maddəsinə əsasən prezidentliyə namizədləri siyasi partiyalar, siyasi partiyaların blokları, seçki hüququ olan vətəndaşlar bu Məcəllənin 53-cü və 54-cü maddələrinə uyğun olaraq irəli sürə bilərlər.
Seçki hüququ olan hər bir vətəndaş, yaxud vətəndaşlar prezidentliyə namizəd irəli sürmək üçün azı 100 nəfərdən ibarət olan seçicilərin təşəbbüs qrupunu yarada bilərlər.
Namizəd öz təşəbbüsü ilə və ya aktiv seçki hüququ olan seçicilər tərəfindən o şərtlə irəli sürülə bilər ki, ərazisində namizədin dəstəklənməsi üçün zəruri olan imzaların yığıldığı və namizədin qeydə alınmasının nəzərdə tutulduğu Mərkəzi Seçki Komissiyasına bu barədə bildiriş göndərilsin.
Namizəd, yaxud namizədi irəli sürən seçicilərin təşəbbüs qrupu öz təşəbbüsü barədə Mərkəzi Seçki Komissiyasına yazılı bildiriş verir. Bildirişdə namizədi irəli sürən hər bir təşəbbüsçünün və namizədin soyadı, adı, atasının adı, doğum tarixi, yaşayış yerinin ünvanı, şəxsiyyət vəsiqəsinin və ya onu əvəz edən sənədin seriyası və nömrəsi, bundan başqa irəli sürülən namizədin əsas iş və ya xidmət yeri, tutduğu vəzifəsi (bu olmadıqda – fəaliyyət növü) göstərilməlidir.
Prezidentliyə namizəd irəli sürmək məqsədi ilə təşəbbüs qrupu yaratmaq istəyən seçicilər tərəfindən yığıncaq keçirilir. İclasdan qabaq təşəbbüs qrupunu yaratmaq istəyən seçicilərə yığıncağın keçirilməsinin yeri və vaxtı barədə məlumat verilir. Təşəbbüs qrupunun üzvlərinin müxtəlif ərazi vahidlərində yaşamaları faktı onların təşəbbüs qrupunun üzvü olmasına maneə ola bilməz.
Həmin yığıncaqda aşağıdakı məsələlər müzakirə olunur:
  - azı 100 nəfərdən ibarət olan seçicilərin təşəbbüs qrupunun yaradılması;
  - prezidentliyə namizədin irəli sürülməsi;
  - prezidentliyə namizədin müdafiəsi üçün imza toplayan şəxslərin təyin edilməsi;
  - prezidentliyə namizədin səlahiyyətli nümayəndələrinin təyin edilməsi;
  - seçicilərin təşəbbüs qrupu kimi qeydə alınması və prezidentliyə namizədliyi irəli sürülən şəxsin qeydə alınması barədə qərar verilməsi üçün Mərkəzi Seçki Komissiyasına bildirişlə müraciət edilməsi.
Göstərilən məsələlər seçicilərin təşəbbüs qrupunun yığıncağında müzakirə edilərək qərarlar çıxarılır və protokol tərtib olunur. Həmin protokolu iclasın sədri və katibi imzalayır.
Seçicilərin təşəbbüs qrupunun yığıncağının protokolu və bildirişin hər bir vərəqi, əgər yığıncaq müəssisə, idarə və ya təşkilatda keçirilirsə, həmin təşkilat, idarə və ya müəssisənin möhüründən istifadə etməklə, əgər yığıncaq seçicilərin yaşayış yeri üzrə keçirilirsə, mənzil istismar sahəsinin və ya müvafiq bələdiyyələrin möhüründən istifadə etməklə təsdiqlənir.
Mərkəzi Seçki Komissiyasına prezidentliyə namizəd və ya onun səlahiyyətli nümayəndəsi tərəfindən aşağıdakı sənədlər təqdim edilir:
  - seçicilərin təşəbbüs qrupunun yaradılması barədə yığıncağın protokolu;
  - seçicilərin təşəbbüs qrupu üzvlərinin siyahısı (siyahıda üzvlərin soyadı, adı, atasının adı, doğum tarixi, yaşadığı yerin ünvanı, şəxsiyyət vəsiqəsinin və ya onu əvəz edən sənədin seriyası və nömrəsi, imzası göstərilməlidir);
  - prezidentliyə namizədin səlahiyyətli nümayəndələrinin siyahısı;
  - prezidentliyə irəli sürülən namizədin soyadı, adı, atasının adı, doğum tarixi, Azərbaycan Respublikasının ərazisində 10 ildən artıq daimi yaşaması və yaşadığı yer, şəxsiyyət vəsiqəsinin və ya onu əvəz edən sənədin seriyası və nömrəsi, iş və ya xidmət yeri, tutduğu vəzifəsi (bu olmadıqda fəaliyyət növü), partiyalılığı, namizədliyə irəli sürülməsi haqqında razılıq ərizəsi.
Namizədin ərizəsində Azərbaycan Respublikası Konstitusiyasının 100-cü maddəsində nəzərdə tutulan tələblər də göstərilməlidir.
Namizəd öz ərizəsinə siyasi partiyaya mənsubiyyəti barədə məlumatları daxil edə bilər. Belə halda namizəd mənsub olduğu siyasi partiyanın 5 sözdən çox olmayan adla adlandırılmasını Mərkəzi Seçki Komissiyası ilə razılaşdırır. Ərizədə göstərilmiş siyasi partiya namizədi öz sıralarından xaric edibsə və Mərkəzi Seçki Komissiyasına bildiriş göndəribsə, həmin bildiriş alındıqdan sonra həmin namizədlə əlaqədar siyasi partiyanın adından istifadə edilə bilməz.
Mərkəzi Seçki Komissiyası tərəfindən təqdim edilmiş sənədlərin alınması barədə prezidentliyə namizədə və ya onun səlahiyyətli nümayəndəsinə yazılı arayış verilməlidir.
Mərkəzi Seçki Komissiyası təqdim edilmiş sənədlərə 5 gün müddətində baxır və prezidentliyə namizədə və ya onun səlahiyyətli nümayəndəsinə seçicilərin təşəbbüs qrupunun qeydiyyatını və namizədin irəli sürülməsini təsdiq edən qərar təqdim edir.