Azərbaycan Respublikası
Mərkəzi Seçki Komissiyasının
12 iyul 2003-cü il tarixli
11/65 saylı qərarı ilə təsdiq edilmişdir

Seçki bülletenləri və zərflərin hazırlanması, dairə və məntəqə seçki komissiyalarına verilməsi
qaydaları haqqında

T Ə L İ M A T

1. Seçki bülletenlərinini mətni və forması, sayı, eləcə də onların qoyulması üçün müvafiq olçüdə və formada zərflərin hazırlanması səsvermə gününə azı 35 gün qalmış Mərkəzi Seçki Komissiyası tərəfindən qərarla təsdiq edilir.
1.1. Seçki bülletenlərində namizədlərin soyadları əlifba sırası ilə yerləşdirilir. Hər seçki bülleteni bir-bir ardıcıl olaraq nömrələnməlidir və bülletendə onun doldurulması qaydası haqqında izahat verməlidir. Nömrə seçki bülleteninin kəsilən küncündə yerləşdirilir.
1.2. Seçki bülletenlərinin və onların qoyulması üçün müəyyən edilmiş formada zərflərin haırlanması üçün Mərkəzi Seçki Komissiyası tərəfindən poliqrafiya müəssisələrinə aşağıdakı sənədlər təqdim edilir:
- seçki bülletenlərinin çap olunması və müvafiq ölçüdə zərflərin hazırlanması haqqında Mərkəzi Seçki Komissiyasının məktubu və qərarı;
- seçki bülletenləri və zərflərin Mərkəzi Seçki Komissiyasl tərəfindən təsdiq edilmiş nümunəsi;
- zərflərin ölçüsü seçki qutusunun yarığının olçüsünə uyğun olmalıdır;
- hər bir seçki dairəsi üzrə seçki bülletenlərinin sayı barədə məlumat.
1.3. Seçki bülletenləri və zərfləri Mərkəzi Seçki Komissiyası nümayəndələrinin müşahidəsi altında poliqrafiya müəssisələrində səsvermə gününə ən azı 10 gün qalmış hazırlanır.
1.4. Hazırlanmış seçki bülletenləri və zərflərin sayı müvafiq seçki dairəsində qeydə alınmış seçicilərin sayından ən çoxu 3 faiz artıq ola bilər.
2. Poliqrafiya müəssisəsinin səlahiyyətli nümayəndəsi yararsız seçki bülletenlərinin seçilib ayrılmasını təmin edir və Mərkəzi Seçki Komissiyasının səlahiyyətli üzvünə (üzvlərinə) bülleten və zərflərin sayı, buraxılma tarixi, nömrələri və vaxtı göstərilmiş akt üzrə təhvil verildikdən sonra poliqrafiya müəssisəsinin işçiləri çıxdaş olunmuş və artıq çap edilmiş bülletenləri məhv edir və bu barədə bütün iştirakçıların imzası qoyulmaqla akt tərtib edir.
2.1. Həmin hərəkətlərin edilməsini Mərkəzi Seçki Komissiyasının üzvləri ilə yanaşı namizədlər və onların səlahiyyətli nümayəndələri, siyasi partiyalar, siyasi partiyalar blokununu səlahiyyətli nümayəndələri, müşahidəçilər və KİV nümayəndələri müşahidə edə bilərlər. Mərkəzi Seçki Komissiyası həmin şəxslərə seçki bülletenlərinin və zərflərin buraxılması yeri və vaxtı haqqında qabaqcadan məlumat verməlidir.
2.2. Mərkəzi Seçki Komissiyası poliqrafiya müəssisəsindən seçki bülletenlərini və zərfləri aldıqdan sonra səsvermə gününə azı 5 gün qalmış müvafiq dairə seçki komissiyasının sədri və katibliyinin iştirakı ilə bülleten və zərflərin sayını, verilmə tarixini, vaxtını göstərməklə akt tərtib edir. Dairə seçki komissiyası isə səsvermə gününə azı 3 gün qalmış seçki bülletenlərini və zərfləri yuxarıda göstərilən qaydada məntəqə seçki komissiyalarına çatdırır.
2.3. Hər bir məntəqə seçki komissiyasına verilən seçki bülletenləri və zərflərin sayı dairə seçki komissiyasının qərarı ilə müəyyənləşdirilir. Məntəqə seçki komissiyalarına verilmiş seçki bülletenləri və zərflərin sayı onların verildiyi günədək seçki məntəqəsi üzrə siyahıya daxil edilmiş seçicilərin sayının 90 faizdən az, 0,5 faizdən isə artıq ola bilməz.
2.4. Əgər verilməli olan və alınan seçki bülletenləri və zərflərin sayı düz gəlməzsə, dairə seçki komissiyası bu uyğunsuzluqlar haqqında dərhal məlumatlandırılır. Seçki bülleteninin üz tərəfinin yuxarı sağ küncü məntəqə seçki komissiyasının möhürü ilə təsdiq edilir.
3. Seçki bülletenləri və zərflərin verilməsi və saxlanılması üçün seçki bülletenləri verən, qəbul edən və mühafizə edən seçki komissiyalarının sədrləri məsuliyyət daşıyırlar.
3.1. Seçki bülletenləri və zərfləri Mərkəzi Seçki Komissiyasından dairə seçki komissiyasına, dairə seçki komissiyalarından isə məntəqə seçki komissiyalarına təhvil verilib alınarkən müvafiq qaydada 2 nüsxədən ibarət akt tərtib olunur. Akt bir tərəfdən Mərkəzi Seçki Komissiyasının vəzifəli şəxsi (şəxsləri), digər tərəfdən dairə seçki komissiyasının sədri və (katibləri), yaxud da məntəqə seçki komissiyasının sədri və (katibləri) tərəfindən imzalanır. Bütün bu proseslərdə bu təlimatın 2.1.-2.4.-cü bəndlərində göstərilən şəxslər iştirak edə bilərlər. Həmin şəxslərin siyahısı akta əlavə edilir.
4. Seçki bülletenləri və zərflər seçki məntəqələrinə verildikdən sonra yalnız seçki məntəqəsində saxlanmalı və etibarlı qorunan yerdə saxlanmalıdır.