Azərbaycan Respublikası
Mərkəzi Seçki Komissiyasının
12 iyul 2003-cü il tarixli
11/69 saylı Qərarı ilə təsdiq edilmişdir

Seçicilərin seçici siyahısına daxil olmalarını təsdiqləyən seçici vəsiqələrinin hazırlanması və verilməsi qaydaları haqqında

İZAH

1. Azərbaycan Respublikasının Seçki Məcəlləsinin 46.2-ci maddəsinə əsasən seçicilərin seçici siyahısına daxil olmalarını təsdiqləyən sənəd seçici vəsiqəsidir. Seçici vəsiqəsində hər bir seçicinin soyadı, adı, atasının adı, doğum tarixi, yaşayış yerinin ünvanı, siyahıya alındığı seçki dairəsinin adı və səs verəcəyi seçki məntəqəsinin nömrəsi, habelə seçki məntəqəsinin ünvanı da göstərilir.
1.1 Seçici vəsiqənin nümunəsi Azərbaycan Respublikası Mərkəzi Seçki Komissiyası tərəfindən təsdiq olunur və seçici siyahılarının blankları ilə birlikdə səsvermə gününə 50 gün qalmış dairə seçki komissiyalarına verilir.
1.2. Dairə seçki komissiyaları da öz növbəsində seçici siyahılarının blankları ilə birlikdə, səsvermə gününə 45 gün qalmışa qədər, seçici vəsiqələrini də müvafiq məntəqə seçki komissiyalarına çatdırır.
1.3. Məntəqə seçki komissiyaları tərəfindən seçici vəsiqələri səsvermə gününə ən çoxu 10 və ən azı 5 gün qalmış seçicilərə verilir.
1.4. Seçici vəsiqəsində seçicinin soyadı, adı, atasının adı, doğum tarixi, yaşayış yerinin ünvanı, seçki dairəsinin sayı və adı, səsvermənin saat 8.00-dan 19.00-a kimi keçirilməyi, habelə seçicinin səs verəcəyi seçki məntəqəsinin ünvanı, telefon nömrəsi və sıra sayı da göstərilir. Bundan əlavə seçici vəsiqəsində “səs verməyə gələrkən şəxsiyyət vəsiqəsini və ya onu əvəz edən sənədi gətirməyi unutmayın” sözləri də yazılır.
1.5. Səsvermə günü səsverməyə gələn hər bir seçiciyə seçki bülleteni, seçici vəsiqəsi ilə birlikdə şəxsiyyət vəsiqəsi və ya onu əvəz edən sənəd təqdim edildikdə verilir. (Seçici vəsiqəsinin nümunəsi izaha əlavə olunur).