Azərbaycan Respublikası
Mərkəzi Seçki Komissiyasının
12 iyul 2003-cü il tarixli 11/67 saylı
Qərarı ilə təsdiq edilmişdir

Seçicilərin vaxtından əvvəl səsvermə qaydaları haqqında

İ z a h

1.1. Azərbaycan Respublikası Prezidentinin seçkilər günü səsvermə saat 8.00-dan 19.00-a kimi keçirilir.
1.2. Mərkəzi Seçki Komissiyası səsvermə gününə azı 5 gün qalmış bülletenləri zərflərlə birlikdə sədr və katiblərin iştirakı ilə tərtib edilmiş akt əsasında müvafiq dairə seçki komissiyalarına təhvil verir.
1.3. Müvafiq dairə seçki komissiyası Azərbaycan Respublikasının bayrağı altında üzən gəmilərdə, uzaq və yolu çətin olan yerlərdə səsvermə gününə 10 gün qalmış səsverməni keçirməyə icazə verə bilər. Bunun üçün dairə seçki komissiyası müvafiq qərar qəbul edir.
1.4. Bu məqsədlə müvafiq dairə seçki komissiyası səsvermə gününə ən geci 20 gün qalmışa qədər Mərkəzi Seçki komissiyasına müraciət edərək vaxtından əvvəl səsverməni keçirməsinin səbəbləri barədə əsaslandırılmış məlumat verməlidir.
1.5. Dairə seçki komissiyası həmin məlumatında vaxtından əvvəl səsver-mənin keçiriləcəyi seçki məntəqələrinin və seçicilərin sayını, həmçinin zəruri sayda bülleten və zərflərin sayını da göstərməlidir.
1.6. Dairə seçki komissiyasının müraciətinə əsasən Mərkəzi Seçki Komissiyası səsvermə gününə ən geci 10 gün qalmış, müvafiq dairə seçki komissiyasına göstərilən miqdarda zərflərlə birlikdə bülletenləri, dairə seçki komissiyasının sədr və katiblərinin iştirakı ilə tərtib olunmuş akt əsasında verir.
Müstəsna hallarda Azərbaycan Respublikasının bayrağı altında üzən gəmilərində təşkil edilmiş seçki məntəqələri üçün seçki bülletenlərinin, səsvermənin nəticələri haqqında protokolun mətni radioqramma vasitəsi ilə və ya başqa texniki vasitələrindən istifadə etməklə çatdırıla bilər.
1.7. Azərbaycan Respublikasının Seçki Məcəlləsinin tələblərinə müvafiq olaraq məntəqə seçki komissiyası səsvermə başa çatdıqdan sonra 24 saatdan gec olmayaraq səsvermənin nəticəsi haqqında protokolu dairə seçki komissiyasına təqdim edir.
1.8. Xəzər dənizinin Azərbaycan Respublikasına məxsus olan sektorunda yerləşən neft platformasında, səsvermə günü üzən gəmilərdə, seçicilərin müvəqqəti olduqları yerlərdə – xəstəxanalarda, sanatoriyalarda, istirahət evlərində, azadlıqdan məhrum etmə yerlərində, istintaq təcridxanalarında, müvəqqəti saxlama yerlərində seçici siyahılarına daxil edilmiş bütün seçicilər səsvermədə iştirak ediblərsə, məntəqə seçki komissiyaları səsvermənin vaxtından qabaq qurtarması haqqında məlumat verə bilərlər.