Azərbaycan Respublikası
Mərkəzi Seçki Komissiyasının
21 iyun 2003-cü il tarixli
3/15 saylı qərarı ilə təsdiq
edilmişdir.

Azərbaycan Respublikası Prezidentliyinə namizədin gəlirlərinin miqdarı, mənbələri,
mülkiyyəti və əmlakları barədə məlumatın toplanması

Q A Y D A S I

Azərbaycan Respublikası Seçki Məcəlləsinin 58-ci maddəsinin 1.4 - 1.5-ci bəndlərinə və 58-ci maddəsinin 3-cü bəndinə uyğun olaraq namizədlər gəlirlərinin miqdarı, məbləği, mülkiyyət hüququ əsasında onlara məxsus əmlak haqqında məlumat verirlər.
Məlumatda aşağıda qeyd olunan gəlir mənbələri göstərilməlidir (gəlirlərin alındığı təşkilatlardan və fiziki şəxslərdən il ərzində həmin gəlirlərin cəmi barədə arayışlar təqdim edilməlidir):

1. Əsas iş yerindən əmək haqqı barədə
Əsas iş yerindən əmək haqqı dedikdə vətəndaşlar tərəfindən müəssisələr, idarələr və təşkilatlarla bağlanmış əmək müqavilələrinə (kontraktlara) əsasən konkret ixtisas, dərəcə və vəzifə üzrə işlərin yerinə yetirilməsi, yaxud kooperativdə, kəndli-fermer təsərrüfatında, ictimai və ya dini təşkilatda, vəkillikdə, habelə xidməti və ya tədrislə əlaqədar əmək funksiyasının yerinə yetirilməsinə görə ödənişlər başa düşülür.

2. Mükafat və maddi yardım haqqında
Mükafat və maddi yardım dedikdə il ərzində işin yekununa görə mükafat, xidmət illərinə görə mükafat, birdəfəlik xarakter daşıyan əlavə mükafatların bütün növləri, yubiley və bayram günləri, doğum günləri ilə bağlı və digər oxşar hallarda verilən həvəsləndirici ödənclər, əmək funksiyalarının yerinə yetirilməsinə görə digər mükafatlar və bütün növlərdən olan maddi yardımlar başa düşülür.

3. Mülki-hüquqi müqavilələrdən əldə olunan gəlir haqqında
Mülki-hüquqi müqavilələrdən əldə olunan gəlir dedikdə vətəndaşların əsas iş yerində əmək haqqı, vəzifə icrası ilə əlaqədar olmayan işləri yerinə yetirməkdən (birdəfəlik işlərin yerinə yetirilməsindən, əvəzçilik üzrə işlərdən) əldə etdikləri gəlirlər başa düşülür.

4. Sahibkarlıq fəaliyyətindən əldə edilən gəlir haqqında
Sahibkarlıq fəaliyyətindən əldə edilən gəlir dedikdə Azərbaycan Respublikasının mövcud qanunvericiliyi ilə nəzərdə tutulan və qanunla qadağan edilməyən fəaliyyət növlərindən əldə edilmiş gəlirlər başa düşülür (sahibkarlıqla məşğul olan fiziki şəxs tərəfindən ilin yekununa görə vergi orqanlarına təqdim edilmiş bəyannamədə göstərilən gəlir).

5. Qeyri sahibkarlıq fəaliyyətindən əldə edilən gəlir haqqında
Qeyri sahibkarlıq fəaliyyətindən gəlirə muzdlu işlə əlaqədar əldə edilən və sahibkarlıq fəaliyyətindən əldə olunan gəlirlərdən başqa digər gəlirlər daxil edilir:

o cümlədən:

- banklardan və kredit idarələrindən alınmış faizlər;
- dividendlər;
- müəlliflik haqqı;
- royalti;
- qiymətli kağızlar üzrə əməliyyatlardan əldə edilən gəlir;
- bağışlanmış borcun məbləği;
- əmlakın icarəyə verilməsindən əldə edilən gəlir;
- həyatın yığım sığortası üzrə gəlir;
- ailə üzvü olmayan şəxslərdən alınan hədiyyələr və maddi yardım;
- alınmış miraslar;
- lotoreya uduşları:
- sair gəlirlər (sair gəlirlər dedikdə yuxarıda sadalanmayan digər gəlirlər nəzərdə tutulur).

6. Əmlak və mülkiyyət haqqında məlumatlar müvafiq orqanlardan (Əmlak Nazirliyinin təşkilatlarından, mənzil-istismar sahələrindən, texniki inventar bürolarından) alınmış arayışlarla təsdiq olunur.