Azərbaycan Respublikası Mərkəzi Seçki Komissiyasının
21 iyun 2003-cü il tarixli 3/08 saylı Qərarı ilə təsdiq edilmişdir.

Azərbaycan Respublikası Mərkəzi Seçki Komissiyasının

R E Q L A M E N T İ

1. Ümumi müddəalar
1.1. Bu Reqlament Azərbaycan Respublikası Seçki Məcəlləsinin 28.1 maddəsinə uyğun olaraq Azərbaycan Respublikası Mərkəzi Seçki Komissiyasının (bundan sonra Mərkəzi Seçki Komissiyası adlandırılacaq) iclaslarının keçirilməsi qaydalarını müəyyən edir.
1.2. Mərkəzi Seçki Komissiyasının iclasları bu Reqlament əsasında qurulur və aparılır.
1.3. Mərkəzi Seçki Komissiyasının üzvləri səlahiyyətləri çərçivəsində Azərbaycan Respublikasının Seçki Məcəlləsi ilə müəyyən olunmuş məsələləri iclasa çıxarır və müvafiq qərarlar qəbul edir.

2. Mərkəzi Seçki Komissiyası iclaslarının aparılmasının ümumi qaydaları
2.1. Mərkəzi Seçki Komissiyası iclaslarının keçirilməsi Mərkəzi Seçki Komissiyası sədrinin təşəbbüsü ilə və ya Komissiya üzvlərinin azı 1/3 - nin tələbi ilə çağırılır.
Bu cür tələb Mərkəzi Seçki Komissiyasının sədrinə ünvanlanan yazılı müraciət əsasında olmalıdır.
2.2. İclaslarda Mərkəzi Seçki Komissiyasının sədri sədrlik edir.
2.3. Mərkəzi Seçki Komissiyasının iclaslarında Komissiya Katibliyinin struktur bölmələrinin rəhbərləri, ekspertlər, kütləvi informasiya vasitələrinin nümayəndələri, həmçinin dəvət olunmuş digər şəxslər də iştirak edə bilərlər.
Mərkəzi Seçki Komissiyasının iclaslarında Komissiyanın əvəzedici üzvləri iclası müşahidə edə bilərlər.

3. Mərkəzi Seçki Komissiyası iclaslarının keçirilməsi şərtləri
3.1. Mərkəzi Seçki Komissiyasının iclaslarında məruzəçilərə 10 dəqiqəyədək, əlavə məruzə üçün 5 dəqiqəyədək, məsələlərin müzakirəsi üçün 5 dəqiqəyədək, müxtəlif sənəd layihələrinin müzakirəsi üçün 5 dəqiqəyədək, arayış, müraciət və açıqlama vermək üçün 3 dəqiqəyədək vaxt verilir.
3.2. Məsələnin mahiyyəti üzrə müzakirə üçün yuxarıda göstərilən müddətləri Mərkəzi Seçki Komissiyası üzvlərinin təklifi əsasında Mərkəzi Seçki Komissiyasının sədri artıra bilər.
3.3. Mərkəzi Seçki Komissiyasının iclasları Azərbaycan dilində keçirilir.

4. Mərkəzi Seçki Komissiyası iclaslarının hazırlanması
4.1. Mərkəzi Seçki Komissiyasının iclasları haqqında Komissiyanın üzvləri Komissiyanın sədri tərəfindən iclasın keçirilməsindən 5 gün əvvəl, lakin iclasın keçirilməsinə ən azı 3 gün qalmış xəbərdar edilirlər. Mərkəzi Seçki Komissiyasının iclasının vaxtı haqqında məlumat Komissiya üzvlərinə yazılı formada və ya elektron kommunikasiya vasitələri ilə şəxsən çatdırılır.
İclasın vaxtı haqqında məlumat səsverməyə 5 gündən az qalmışdırsa, 24 saat müddətində , səsvermə günü isə dərhal və şəxsən çatdırılır.
4.2. Mərkəzi Seçki Komissiyasının iclası onun azı 10 üzvü iştirak etdikdə səlahiyyətli hesab olunur.
4.3. Mərkəzi Seçki Komissiyasının iclaslarında baxılan məsələlər üzrə, bir qayda olaraq, Mərkəzi Seçki Komissiyasının katibləri məruzə edirlər.
Mərkəzi Seçki Komissiyasının sədri Komissiyanın üzvləri arasından məruzəçi təyin edə bilər.
Məruzəçi lazımi sənəd və materialları toplayır, məsələyə hərtərəfli, tam və obyektiv baxılması üçün zəruri tədbirlər görür, məsələ üzrə məruzə hazırlayır.
4.4. Mərkəzi Seçki Komissiyasının iclasları başlananadək Mərkəzi Seçki Komissiyası Katibliyinin Ümumi şöbəsi Komissiya üzvlərinin qeydiyyatını aparır, əlavə məlumat barədə onları xəbərdar edir və bu haqda Mərkəzi Seçki Komissiyasının sədrinə məlumat verir.

5. Mərkəzi Seçki Komissiyası iclasının təxirə salınması və ya başqa vaxta keçirilməsi
5.1. İclasın gedişində sədrlik edən fasilə elan edə bilər. Gündəliyə çıxarılan məsələləri bir iş günü ərzində başa çatdırmaq mümkün olmadıqda fasilə elan edilir və iclasın keçirilmə vaxtı barədə məlumat verilir.
5.2. Aşağıdakı hallarda Mərkəzi Seçki Komissiyasının iclası təxirə salına və ya başlanmış iclas başqa vaxta keçirilə bilər:
- Mərkəzi Seçki Komissiyası üzvlərinin sayında yetərsay olmadıqda;
- məsələyə hərtərəfli, tam və obyektiv baxılmasında maraqlı subyekt, ekspert və digər şəxslərin iştirakını təmin etmək mümkün olmadıqda;
- iclasla əlaqədar tələb olunan sənədlər və materiallar Mərkəzi Seçki Komissiyasının üzvlərinə qanunla müəyyən olunmuş müddətdə təqdim edilmədikdə;
- Mərkəzi Seçki Komissiyasının iclasında baxılan məsələlərin hərtərəfli, tam və obyektiv araşdırılmasına maneəçilik törədə biləcək başqa hallar olduqda;
5.3. Mərkəzi Seçki Komissiyasının iclasında iştirak edən üzvlərin sayı Azərbaycan Respublikasının Seçki Məcəlləsinin 19.10-cu maddəsində göstərilənlərdən azdırsa, iclas təxirə salınır və zəruri olan məsələnin müzakirəsi üçün növbəti iclas (seçkilər gününə 6 gün qalmışdan az müddət zamanı və səsvermə günü ən azı 3 saat müddətində) çağırılır. Növbəti iclas zamanı iclasda iştirak edən üzvlərin sayı yenə də 2/3-dən az olarsa, bu zaman (seçkilər gününə 6 gün qalmışdan az müddət zamanı və səsvermə günü ən azı 3 saat müddətində) üçüncü iclas çağırılır. Üçüncü iclasda yenə də üzvlərin ən azı 2/3-si iştirak etməzsə, bu zaman Mərkəzi Seçki Komissiyası iclasının səlahiyyətli olması üçün iştirak edən üzvlərin sayı 2/3-dən yarıyadək endirilir.
5.4. Azərbaycan Respublikası Seçki Məcəlləsində qəbul edilməsi üçün son müddət nəzərdə tutulmuş qərarların Mərkəzi Seçki Komissiyasında müzakirəsi zamanı onların səsvermə yolu ilə bu Reqlamentin 8.5-cı bəndində göstərilən qaydada 3 dəfə qəbul edilməsi mümkün olmazsa və yaranan fikir ayrılığı aradan qaldırıla bilməzsə, bu zaman qərarın qəbul edilməsi üçün lazım olan səs çoxluğu adi səs çoxluğu ilə əvəz edilir.

6. Mərkəzi Seçki Komissiyası iclasının aparılması qaydaları
6.1. Mərkəzi Seçki Komissiyasının iclaslarına sədrlik edən:
- iclası açıq elan edir və gündəliyə çıxarılan məsələlər haqqında Mərkəzi Seçki Komissiyasının üzvlərinə məlumat verir və gündəliyə əlavələrin olub - olmamasını aydınlaşdırır;
- iclasın gündəliyindəki məsələləri səsə qoyur, onların müzakirəsini təşkil edir;
- Mərkəzi Seçki Komissiyasının üzvlərinə, həmçinin dəvət edilmiş digər şəxslərə çıxış üçün növbə gözləmək şərti ilə söz verir;
- Mərkəzi Seçki Komissiyası üzvlərinin və dəvət olunmuş digər şəxslərin çıxış üçün bu Reqlamentə əməl etmələrini təmin edir.
6.2. Məruzəçi və ya çıxış edən üzv çıxışında gündəlikdə duran məsələlərdən kənara çıxdığı halda, iclasda sədrlik edən müzakirə olunan məsələnin mahiyyəti barədə danışmağın vacibliyini ondan tələb edir.
6.3. Məruzəçi və ya çıxış edən üzv bu Reqlamentdən kənara çıxdıqda sədrlik edən çıxışı kəsə bilər.
6.4. Mərkəzi Seçki Komissiyası iclasının gündəliyinə daxil olan məsələlərin müzakirəsi başa çatdıqda iclasa sədrlik edən iclası bağlı elan edir.

7. Mərkəzi Seçki Komissiyası üzvlərinin iclasda hərəkətləri
7.1. Komissiya üzvləri aşağıdakıları tələb edə bilərlər:
- iclasın keçirilməsi barədə əvvəlcədən məlumatlandırılmaq;
- iclasın gündəliyinə çıxarılan məsələlərlə tanış olmaq;
- Mərkəzi Seçki Komissiyası Katibliyindən lazımi arayış və məlumatlar əldə etmək;
- normativ sənədlərin layihələri ilə tanış olmaq;
- bu Reqlamentə uyğun çıxışlar və məruzələr etmək, müzakirələrdə iştirak etmək;
7.2. Komissiya üzvləri aşağıdakılara riayət etməlidirlər:
- xəstələnmə və digər üzürlü səbəblər istisna olmaqla Mərkəzi Seçki Komissiyasının bütün iclaslarında iştirak etmək;
- Mərkəzi Seçki Komissiyası sədrinin müəyyən etdiyi iş bölgüsü əsasında fəaliyyət göstərmək;
- iclasa çıxarılan məsələlərlə bağlı məruzələrdə iştirak etmək;
- bu Reqlamentin müddəalarına əməl etmək;
- çıxış üçün onlara ayrılmış vaxtdan səmərəli istifadə etmək;
- etik normalara riayət etmək.
7.3. Mərkəzi Seçki Komissiyasının üzvü ona həvalə edilən sənədləri hərtərəfli araşdırır və nəticəsi barədə tərtib olunmuş arayışı qanunvericiliklə müəyyən olunmuş qaydada Katibliyin Ümumi şöbəsinə təqdim edir;
7.4. İclas zamanı Mərkəzi Seçki Komissiyası üzvünün etik qaydalara riayət etməməsi, iclası pozmağa cəhd göstərməsi, etiraz əlaməti olaraq iclas zalını tərk etməsi kimi hərəkətlər yolverilməzdir. Bu cür hərəkətlər qanun pozuntusu kimi qiymətləndirilir və tədbir görülməsi üçün Komissiya üzvünü təyin etmiş orqana məlumat verilir.

8. Mərkəzi Seçki Komissiyasının iclaslarında səsvermə və qərarların qəbuledilmə qaydaları
8.1. Mərkəzi Seçki Komissiyası qanunvericiliklə səlahiyyətlərinə aid olan məsələlər üzrə qərarlar qəbul edir.
Muzakirəyə çıxarılan məsələlərə baxılarkən Mərkəzi Seçki Komissiyasının üzvləri əsas məruzəçini, həmçinin əlavə məruzəçiləri dinləyir və layihə ətrafında müzakirələr aparırlar.
8.2. Mərkəzi Seçki Komissiyasının üzvləri tərəfindən əsas götürülmüş sənəd layihəsi bütövlükdə və ya ayrı-ayrı maddələr üzrə müzakirə olunur, lazım gəldikdə layihədə düzəlişlər edilir və layihə bütövlükdə səsə qoyulur.
8.3. Səsvermə zamanı sənəd layihəsinə yalnız Mərkəzi Seçki Komissiyasının üzvləri tərəfindən düzəlişlər edilə bilər.
8.4. Səsvermədə Mərkəzi Seçki Komissiyasının üzvü bir səsə malik olmaqla şəxsən səs verir.
8.5. Mərkəzi Seçki Komissiyasının qərarları Mərkəzi Seçki Komissiyasının iclasında 10 üzv iştirak etdikdə – azı 7 nəfərin səs coxluğu ilə; 11 və ya 12 üzv iştirak etdikdə – azı 8 nəfərin səs çoxluğu ilə; 13 üzv iştirak etdikdə – azı 9 nəfərin səs çoxluğu ilə; 14 və ya 15 üzv iştirak etdikdə – azı 10 nəfərin səs çoxluğu ilə qəbul edilir.
8.6. Mərkəzi Seçki Komissiyasının qərarları açıq səsvermə yolu ilə qəbul olunur.
8.7. Mərkəzi Seçki Komissiyasının qərarları dərc olunduğu gündən qüvvəyə minir.

9. Mərkəzi Seçki Komissiyası qərarlarının qəbul edilməsi və iclas protokollarının təsdiq olunması
9.1. Mərkəzi Seçki Komissiyasının iclasında səsverməyə qoyulan məsələnin nəticəsi Komissiyanın sədri tərəfindən elan edilir və bu iclas protokoluna daxil edilir.
9.2. Mərkəzi Seçki Komissiyasının qərarlarını və iclasının protokollarını Komissiyanın sədri və katibləri imzalayırlar.
Adları çəkilən şəxslər qərar və protokolu imzalamadıqda, onları bu sənədə səs verən Komissiya üzvləri imzalayırlar.
Mərkəzi Seçki Komissiyasının iclas protokolları təsdiq olunmaq üçün içlasa ən azı 24 saat qalmış (seçki günü isə gecikdirilmədən) Komissiya üzvlərinə paylanır və Komissiyanın növbəti iclaslarının birində qərarla təsdiq edilir (bu məsələ Komissiya iclasının gündəliyinə birinçi məsələ kimi salınır).
9.3. Mərkəzi Seçki Komissiyasının qəbul edilmiş qərarı ilə razılaşmayan Komissiya üzvləri yazılı formada xüsusi rəy bildirə bilərlər və həmin rəy Mərkəzi Seçki Komissiyasının iclas protokoluna əlavə edilir.
9.4. Mərkəzi Seçki Komissiyasının Azərbaycan Respublikası Prezidenti seçkilərinin yekunlarına dair protokolu səsvermə günündən başlayaraq ən geci 7 gün müddətində təsdiq edilməlidir.
9.5. Mərkəzi Seçki Komissiyasının referendumun yekunlarına dair protokolu səsvermə günündən başlayaraq ən geci 18 gün müddətində təsdiq edilməlidir.

10. Yekun müddəalar
10.1. Bu Reqlamentə əlavə və dəyişikliklər edilməsi barədə təkliflərə Mərkəzi Seçki Komissiyasının iclasında baxılır.
10.2. Reqlamentə əlavə və dəyişikliklər Mərkəzi Seçki Komissiyasının qərarı ilə edilir.